Mədəniyyət siyasəti

Ana səhifə

Mədəniyyət siyasəti

Azərbaycan Dövlət Rus Dram Teatrının 90 illik yubileyi münasibəti ilə təntənəli tədbir keçirilib

21 dekabr 2010 22:11 (UTC +04:00)

Bakı. Ülkər Qasımova – APA. Dekabrın 21-də Səməd Vurğun adına Azərbaycan Dövlət Rus Dram Teatrının 90 illik yubileyi keçirilib. APA-nın məlumatına görə, mərasim 90 illik yubileyini qeyd edən teatrın yaradıcı heyətinin şən mahnı sədaları altında və şux rəqslərlə səhnəyə təşrif buyurması ilə başlayıb. Yubiley mərasimində çıxış edən teatrın baş rejissoru, xalq artisti Aleksandr Şarovski mədəniyyət ocağının tarixi və bu günü haqqında məlumat verib. Mədəniyyət və turizm naziri Əbülfəs Qarayev teatrın kollektivinə ölkə başçısı İlham Əliyevin təbrik məktubunu oxuyub. Daha sonra nazir ölkə prezidentinin sərəncamı ilə fəxri adlara layiq görülən teatrın aktyorlarına mükafatları təqdim edib.

Tədbirdə Rusiya Prezident Administrasiyanın adından da təbrik məktubu oxunub. Rusiyanın Azərbaycandakı səfiri Vladimir Daroxin teatrın kollketivini şeirlə, Azərbaycanın Rusiyadakı səfiri, xalq artisti Polad Bülbüoğlu isə ifası ilə təbrik edib. Daha sonra Üzeyir Hacıbəyli adına Bakı Musiqi Akademiyasının (BMA) rektoru, xalq artisti Fərhad Bədəlbəyli yubiley iştirakçıları üçün royal da yaddaqalan kompozisiya ifa edib. 90 yaşını təntənəli şəkildə qeyd edən qocaman mədəniyyət ocağını təbrik etməyə Azərbaycanın digər teatr kollektivləri də gəlib. Onlar Rus Dram Teatrının səhnəsində öz məharətlərini nümayiş etdiriblər. Sonda isə teatr kollektivi tamaşaçılar qarşısında çıxış edib.
Yubiley tədbirində ölkə ictimaiyyətinin nümayəndələri ilə yanaşı, bir sıra ölkələrdən də qonaqlar qatılıblar. Rusiya prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy da qonaqlar arasında olub. Yubniley mərasiminə qatılanlar arasında filologiya elmləri doktoru, Lomonosov adına Moskva Dövlət Universitetinin Bakı filialının rektoru Nərgiz Paşayeva, xarici işlər nazirin müavini Mahmud Məmməquliyev də olub.