Mədəniyyət siyasəti

Ana səhifə

Mədəniyyət siyasəti

Mədəniyyət və Turizm Nazirliyinin sektor müdiri Naidə İsmayılzadə: “Müsabiqədə fəxri adlara, mükafatlara önəm veriləcək” – FOTOSESSİYA

Mədəniyyət və Turizm Nazirliyinin sektor müdiri Naidə İsmayılzadə: “Müsabiqədə fəxri adlara, mükafatlara önəm veriləcək” – <font color=red>FOTOSESSİYA </font>

13 yanvar 2011 13:10 (UTC +04:00)

Bakı. Ülkər Qasımova – APA. “Azərbaycan Dövlət Akademik Milli Dram Teatrının yeni kollektivinin formalaşması üçün iki ay vaxtımız var. Bu müddət ərzində yeni və sağlam bir kollektiv yaradılmalıdır. Hazırda müsabiqəyə hazırlıq prosesi gedir və bu yaxınlarda Dram Teatrının kollektivi yenidən formalaşdırılacaq. Hələ müsabiqənin günü təyin olunmayıb, ancaq təyin olunmaq ərəfəsindədir”. Bunu APA-ya açıqlamasında Mədəniyyət və Turizm Nazirliyinin İncəsənət şöbəsinin teatr sektorunun müdiri Naidə İsmayılzadə deyib.

Artıq sənəd qəbulunun başa çatdığını açıqlayan N. İsmayılzadə, hər bir aktyorun cv-sinin hazırlandığını söyləyib: “Hər bir aktyorun həyat və yaradıcılığı ilə bağlı bütün məlumatlar toplanıb. Komissiya üzvləri bu məlumatlara baxacaq, onların son beş ildəki fəaliyyətinə nəzər salacaq. Teatr mütəxəssisi və komissiya üzvü olaraq hər bir aktyor və rejissor, eləcə də teatrda işləyən fəhlə haqqında məlumatlıyıq, necə illərdir bu insanlarla çiyin-çiyinə çalışırıq. Onların arasında fəxri adları, mükafatları olan insanlar da var. Biz baxacağıq ki, bu beş il ərzində ad-sanından, tutduğu vəzifədən asılı olmayaraq nə edib və bu gün Akademik Milli Dram Teatrına bu aktyor və ya rejissor lazımdır, ya yox. Şübhəsiz ki, fəxri adlara, mükafatlara önəm veriləcək. Bu titulları qazananlar kifayət qədər zəhməti olan yaradıcı insanlardır, uzun müddətdir bizimlə bərabər çalışırlar. Titullar, fəxri adlar, mükafatlar heç bir sənət insanına əbəs yerə verilməyib. Onların illərlə çəkdiyi zəhmətin nəticəsində, yaratdıqları rolların, işlərin müqabilində verilib”.

N. İsmayılzadə müsabiqədə iştirak üçün respublika üzrə elan verildiyinə diqqət çəkib: “Ölkəmizin hər bölgəsindən olan yaradıcı şəxslərin Milli Dram Teatrına müraciəti üçün imkan yaradıldı, ərizələrini, sənədlərini təqdim etdilər. Onlar da Azərbaycanın ana teatrında çalışmaq imkanı qazana bilərlər. Yaşından və yaşadığı bölgədən asılı olmayaraq, teatr sənətinə bağlı olan hər bir şəxsin ərizə vermək hüququ vardı. Azərbaycan Dövlət Akademik Milli Dram Teatrında dünya standartlarına cavab verəcək formada təmir-bərpa işləri aparılaraq müasir bir bina yaradıldı. Müasir binada günün tələblərinə cavab verən, müasir mövzulu tamaşalar hazırlayan, böyük tamaşaçı kütləsi cəlb edən, beynəlxalq səviyyəli festivallarda iştirak edən bir teatr yaranmalıdır. Eyni zamanda istedadları üzə çıxarmaq, gənc rejissorlara yol açmaq üçün bunu etməyi lazım bildik”.

Sektor müdiri müsabiqənin obyektiv keçiriləcəyinə zəmanət verib və bu prosesdə qeyri-obyektivlik olmayacağını vurğulayıb. Onun fikrincə, müsabiqə başa çatdıqdan və yeni kollektiv formalaşdıqdan sonra Akademik Milli Dram Teatrının akademik əvvəlki səviyyəsi qayıdacaq: “Biz hər birimiz Akademik Milli Dram Teatrının akademik səviyyəsinin qaytarılması üçün çalışırıq. İrəliyə getmək lazımdır. Sentyabrda Musiqili Komediya Teatrında, Gənc Tamaşçılar Teatrında da müsabiqələr olacaq. Paytaxt teatrlarının kollektivləri yeniləşdiriləcək”.

N. İsmayılzadənin sözlərinə görə, teatrda rejissorların fəaliyyəti müqavilə əsasında həyata keçiriləcək və onlar da müsabiqə yolu ilə seçiləcəklər: “Rejissorlar müsabiqə əsasında seçiləcək və müqavilə əsasında fəaliyyət göstərəcəklər. Öz ərizələrini verəcəklər, hansı tamaşanı hazırlamaq istədikləri bildirəcəklər. Bədii Şura tərəfindən müraciətlərə baxılacaq və təsdiq olunacaq. Hər bir rejissor istədiyi teatrın repertuarına, yaradıcılıq istiqamətinə uyğun olaraq arzuladığı tamaşanı təqdim edəcək. Bu prosesdə daha çox xaricdən dəvət olunmuş rejissorlara üstünlük veriləcək”.

Müsabiqədən sonra teatrda işçilərin sayının azalıb-azalmayacağının müsabiqə əsnasında müəyyənləşəcəyini deyən N. İsmayılzadə, müsabiqədən keçməyən aktyorların işlə təmin olunacağını da açıqlayıb: “Düşünmürəm ki, müsabiqədən keçməyən aktyor heyəti işsiz qalacaq. Məlum olduğu kimi, hər bir aktyorun ikinci iş yeri Azərbaycan Dövlət Mədəniyyət və İncəsənət Universitetidir. Onların hər birinin ikinci iş yeri var. Bu gün teatrlarımızda aktyorlara, yaradıcı insanlara böyük ehtiyac var”.

N. İsmayılzadə bəyan edib ki, Azərbaycan Dövlət Akademik Milli Dram Teatrı iki aydan sonra öz qapılarını tamaşaçıların üzünə açacaq.

dram_teatr