Mədəniyyət siyasəti

Ana səhifə

Mədəniyyət siyasəti

Ömər Eldarovun 90 illik yubileyinə həsr olunmuş tədbir keçirilib

22 dekabr 2017 08:52 (UTC +04:00)

AMEA "Alimlər evi"nin təşkilatçılığı ilə heykəltəraş, xalq rəssamı, akademik Ömər Eldarovun 90 illik yubileyinə həsr olunmuş tədbir keçirilib.

APA-nın xəbərinə görə, tədbirdən əvvəl Ö. Eldarovun yaradıcılığını əks etdirən sərginin təqdimatı olub.

AMEA prezidenti, akademik Akif Əlizadə bildirib ki, Ö. Eldarov böyük həyat yolu keçib: "Azərbaycan dövləti Ömər müəllimin Azərbaycan elminə, Azərbaycan rəssamlıq məktəbinə verdiyi töhfələri daim qiymətləndirir. Ömər Eldarov unikal istedada malikdir. O, mədəniyyətimizi zənginləşdirən memarlıq nümunələrinin müəllifidir. Ulu öndər Heydər Əliyev, görkəmli oftalmoloq-alim Zərifə Əliyeva və bir sıra tarixi şəxsiyyətlərə həsr olunmuş abidələr məhz Ömər Eldarovun adı ilə bağlıdır".

Azərbaycan Bəstəkarlar İttifaqının sədri Firəngiz Əlizadə yubilyarın fəaliyyətindən danışıb. O deyib ki, Xurşudbanu Natavan, Məhəmməd Füzuli, Hüseyn Cavid, Üzeyir Hacıbəyovun abidələri Ö. Eldarov tərəfindən yaradılıb: "Ömər Eldarovun yaratdığı heykəllər öz janrına görə musiqi əsərləri ilə müqayisə oluna bilər".

Azərbaycan Memarlıq İttifaqının sədri, professor Elbay Qasımzadə qeyd edib ki, Ö. Eldarovun əsərləri ölkə sərhədlərini aşıb.

Tədbir bədii hissə ilə davam edib.