“Dərman vasitələrinin istifadə təlimatının Azərbaycan dilində olması barədə xəbərdarlıq çoxdan verilib. Dəfələrlə bu məsələ ilə bağlı topdansatış müəssisələrinin və xarici şirkətlərin burdakı rəsmi nümayəndəlikləri ilə görüşlər keçirilib və məlumat verilib”. Bu barədə Səhiyyə Nazirliyinin Analitik Ekspertiza Mərkəzindən (AEM) APA-nın sorğusuna cavab olaraq bildirilib.
Qeyd olunub ki, bu məsələnin həlli üçün şirkətlərin kifayət qədər vaxtı olub: "Gələn il yanvarın 1-dək vaxt var. Həm də bu məsələ ilə əlaqədar şirkətlər tərəfindən heç bir narazılıq qeydə alınmayıb. Bu prosesin həyata keçirilməsi əhalinin mənafeyinə uyğun olacaq. İstehlakçı dərmanın istifadə təlimatını Azərbaycan dilində əldə edəcək ki, bu da onun təhlükəsizliyi və rifahına xidmət edəcək”.
Qeyd edək ki, AEM dərman vasitəsi idxalçıları və xarici istehsalçı müəssisələrin rəsmi nümayəndəliklərinə xəbərdarlıq edib. Xəbərdarlıqda bildirilib ki, “Dərman vasitələri haqqında” Azərbaycan Respublikası Qanunu və Nazirlər Kabinetinin 13 iyul 2007-ci il tarixli 108 nömrəli Qərarı ilə təsdiq olunmuş "Dərman vasitələrinin dövlət qeydiyyatı və reyestrinin aparılması Qaydaları"na əsasən dərman vasitələrinin istifadəsinə aid təlimat Azərbaycan dilində olmalıdır. 01. 01. 2017-ci il tarixindən etibarən istifadə təlimatı Azərbaycan dilində olmayan və Səhiyyə Nazirliyi Farmakoloji və Farmakopeya Ekspert Şurası tərəfindən təsdiqlənməmiş formada olan dərman vasitələrinin idxalına icazə verilməyəcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
