Sahibkarlıq

Ana səhifə

Sahibkarlıq

Sorğu: Azərbaycanda sahibkarların 40%-dən çoxu fəaliyyətini genişləndirmək niyyətindədir

08 sentyabr 2008 12:06 (UTC +04:00)

Bakı. Elnur Hüseynquluyev – APA-Economics. Bu gün Bakıda Sahibkarlığın və Bazar İqtisadiyyatının İnkişafına Yardım Fondu (SBİİYF) Beynəlxalq Özəl Sahibkarlıq Mərkəzinin dəstəklədiyi «Azərbaycanda sahibkarlıq mühitinin yaxşılaşdırılması Layihəsi» çərçivəsində kiçik biznes üzrə əsas istiqamət və prioritetlərin dəqiqləşdirilməsi məqsədi ilə 1000 iş adamı arasında keçirdiyi sorğunun nəticələrini açıqlayıb.
«APA-Economics»in məlumatına görə, bu ilin may-iyul aylarında keçirilən sorğu Bakı və respublikanın 11 regionunu əhatə edib. Sorğuda əsas məqsəd kiçik sahibkarlıq üçün mühitin daha da yaxşılaşdırılmasına dair təkliflər paketinin hazırlanması olub.
SBİİYF sədri Sabit Bağırovun sözlərinə görə, sorğu «Puls-R» Sosioloji Xidmət tərəfindən aparılıb. Sorğuda 1000 nəfər iştirak edib ki, bu da ölkədəki kiçik sahibkarlıq subyektlərinin ümumi sayının təxminən 0,4%-ni təşkil edir. Respondentlərin 61,6%-i qeydiyyatdan keçmiş müəssisə sahibi, 38,4%-i fiziki şəxs qismində fəaliyyət göstərən sahibkar, o cümlədən 5,5%-i fermer olub.
«Puls-R» Sosioloji Xidmətin rəhbəri Rasim Musabəyovun sözlərinə görə, sorğu iştirakçılarının əksəriyyəti həm ölkədə, həm də öz fəaliyyət sahələrində mövcud sahibkarlıq mühitini yaxşı və ya məqbul kimi qiymətləndiriblər: «Respondentlərin 40%-dən çoxu öz fəaliyyətini genişləndirmək niyyətindədir, 51,5%-i Azərbaycanda qanunları pozmadan sahibkarlıqla məşğul olmağın mümkünsüzlüyünü qeyd edib, 30%-dən çoxu özünü məmur özbaşınalığından müdafiə olunmuş saymır. Respondentlərin cavablarına əsasən, onların təxminən yarısını ən azı ayda bir dəfə hansısa dövlət orqanının nümayəndəsi ziyarət edir. Bu sahədə liderlik vergi orqanlarına məxsusdur».
Əsassız yoxlamalar və iradlar barədə suala respondentlərin təxminən 2/3-si cavab verməkdən imtina edib. Lisenziyaların alınmasında sərf olunan vaxt və sənədləşdirmə baxımından respondentlər tərəfindən ciddi problemlər qeyd edilməyib. Qanunvericiliklə müəyyən olunmuş 15 gündən bir qədər çox müddətə lisenziya almaq mümkündür. Lakin lisenziya alan 476 nəfərin 2/3-si xərclərə dair suala cavab verməkdən imtina edib.
Həmçinin, Sahibkarlığa Kömək Milli Fonduna 1000 respondentdən 90 nəfər müraciət edib. Müraciət etməyənlərdən 140 Fond haqqında məlumatsızdır, müraciət edənlərin isə 56-sı kredit ala bilib.