Sahibkarlıq

Ana səhifə

Sahibkarlıq

«Doing Business-2009»: Azərbaycan sahibkarlıq fəaliyyətinin əlverişliliyi üzrə aparıcı islahatçı dövlətdir

10 sentyabr 2008 09:33 (UTC +04:00)

Bakı. Nicat Mustafayev – APA-Economics. Bu gün Bakıda Dünya Bankı (WB) və Beynəlxalq Maliyyə Korporasiyası (IFC) tərəfindən hazırlanmış «Biznesin aparılması - 2009» («Doing Business-2009») illik hesabatının təqdimatı keçirilib.
«APA-Economics»in məlumatına görə, 2007-ci ilin iyul ayından 2008-ci ilin iyun ayınadək Azərbaycan hesabatın araşdırdığı 10 sahənin 7-də islahatlar həyata keçirib və «Doing Business-2009» hesabatı tərəfindən sahibkarlıq fəaliyyətinin əlverişliliyi baxımından dünya reytinqində ən böyük yüksəliş əldə edərək 97-ci yerdən 33-cü yerə yüksəlib.
Qiymətlənldirmə yeni müəssisələrin təsis edilməsi (2008-ci ilin hesabatında Azərbaycan 64-cü, 2009-cu ilin hesabatında isə 13-cü yeri tutub), tikinti üçün icazələrin verilməsi (159/155), işə qəbul (80/15), əmlakın qeydiyyatı (56/9), kreditlərin alınması (26/12), investorların hüquq və maraqlarının qorunması (107/18), vergi ödənişi (141/102), gömrük rəsmiləşdirilməsi (173/174), müqavilələrin icrasının təmin edilməsi (30/26) və biznesin bağlanması (75/81) üzrə aparılıb. Burada makroiqtisadi siyasət, infrastrukturun keyfiyyəti, valyutanın sabitliyi, investor cəlbediciliyi və cinayətkarlıq səviyyəsi kimi aspektlər əks olunmayıb.
Dünyanın biznes sahəsində ən çox tənzimləyici islahatlar aparan 10 ölkə sırasına isə Azərbaycan, Albaniya, Qırğızıstan, Belarus, Seneqal, Burkina Faso, Botsvana, Kolumbiya, Dominikan Respublikası və Misir daxil edilib.
Qeyd edək ki, Sinqapur üç il ardıcıl olaraq biznesin aparılması hesabatında tənzimləyici mühitin kommersiya fəaliyyəti üçün əlverişliliyi baxımından dünya ölkələri siyahısında birinci yer tutur. Ondan sonra Yeni Zelandiya, üçüncü pillədə isə ABŞ qərarlaşır.
Ümumiyyətlə, «Doing Business-2009» hesabatı 181 ölkə üzrə araşdırma aparıb və onları kommersiya fəaliyyəti üçün əlverişliliyi baxımından sıralayıb. Belə ki, hesabatda ilk beşliyi Honq-Konq (Çin) və Danimarka tamamlayır. Bu ölkələrin ardınca isə Böyük Britaniya, İrlandiya, Kanada, Avstraliya, Norveç, İslandiya, Yaponiya, Tailand, Finlandiya, Gürcüstan, Səudiyyə Ərəbistanı, İsveç, Bəhreyn, Belçika, Malayziya, İsveçrə, Estoniya, Koreya, Mavritaniya və Almaniya qərarlaşıb.
Hesabatda Türkiyə 59-cu yeri (ötən il 60-cı yer), İran 142-ci yeri (138), Rusiya 120-ci yeri (112), Qazaxıstan 70-ci yeri (80), Özbəkistan 138-ci yeri (145), Ukrayna 145-ci yeri (144), Gürcüstan 15-ci yeri (21), Ermənistan 44-ci yeri (41), Estoniya 22-ci yeri (18), Litva 28-ci yeri (28), Latviya 29-cu yeri (26), Qırğızıstan 68-ci yeri (99), Belarus 85-ci yeri (115), Tacikistan isə 159-cu yeri (156) tutub.