Sahibkarlıq

Ana səhifə

Sahibkarlıq

Azərbaycanda müəssisələrin özəlləşdirmədən sonra dəstəklənməsi layihələrinin təqdimatı keçirilib

10 sentyabr 2008 13:38 (UTC +04:00)

Bakı. Rəşad Süleymanov – APA-Economics. Bu gün Azərbaycan Dövlət Əmlakının İdarə Edilməsi üzrə Dövlət Komitəsi (DƏİEDK) tərəfindən müəssisələrin özəlləşdirmədən sonra dəstəklənməsi sahəsində həyata keçiriləcək layihələrin təqdimatı keçirilib.
«APA-Economics»in məlumatına görə, tədbirdə çıxış edən DƏİEDK-in sədr müavini Rüstəm Şahbazov bildirib ki, komitə tərəfindən ölkə iqtisadiyyatı üçün xüsusi əhəmiyyət kəsb edən ayrı-ayrı sahələrə aid özəlləşdirilmiş müəssisələrin dəstəklənməsi tədbirləri həyata keçirilir. Kənd təsərrüfatı məhsullarının emalı, habelə toxuculuq və tikiş sahəsində özəlləşdirilmiş müəssisələrin dəstəklənməsi, özəlləşdirilmiş müəssisələrin istehsal etdiyi məhsulların rəqabət qabiliyyətinin və ixrac potensialının, habelə özəlləşdirilmiş müəssisələrə investisiyaların cəlb edilməsi əsasında maliyyə potensialının artırılmasının dəstəklənməsi ilə bağlı müvafiq tenderlər elan edilib. Keçirilmiş tenderlərin nəticələrinə görə, «Kənd təsərrüfatı məhsullarının emalı sahəsində özəlləşdirilmiş müəssisələrə dəstək» xidmətlərinin satın alınması üzrə «FİNRE Konsaltinq» MMC, «Toxuculuq və tikiş sahəsində özəlləşdirilmiş müəssisələrin dəstəklənməsi» xidmətlərinin satın alınması üzrə «Azərxüsusisənayeinvest» QTSC, «Özəlləşdirilmiş müəssisələrin istehsal etdiyi məhsulların rəqabət qabiliyyətinin və ixrac potensialının artırılmasının dəstəklənməsi» xidmətlərinin satın alınması üzrə «Region Konsalt» MMC, «Özəlləşdirilmiş müəssisələrə investisiyaların cəlb edilməsi əsasında maliyyə potensialının artırılmasının dəstəklənməsi» xidmətlərinin satın alınması üzrə «Sinergetika» MMM tenderlərin qalib olub. Tenderlərin qalibləri ilə satınalma müqavilələri imzalanıb və qalib şirkətlər tərəfindən müqavilə üzrə nəzərdə tutulmuş xidmətlərin icrasına başlanılıb.
Daha sonra layihələrin təqdimatı keçirilib. Tədbirdə qeyd olunub ki, həyata keçirilən bu 4 layihənin icrası nəticəsində 50-yə yaxın müəssisə fərdi şəkildə dəstəklənəcək. Bu tədbirlər əsas etibarı ilə müəssisələr üçün strateji və biznes planlarının hazırlanması, bazarda tanınmaları üçün İnternet səhifələrinin yaradılması, reklam bukletlərinin tərtibi, tərəfdaşların tapılması, beynəlxalq standartların tətbiqi, mühasibatlıq, İSO standartların tətbiqi, kreditlərin alınması, sərgilərdə iştirakı və s. işlərin görülməsini nəzərdə tutur. Eyni zamanda bu layihələr çərçivəsində 24 müəssisə rəhbəri bir həftəlik xarici təcrübə səfərinə göndəriləcək. Həmçinin, bu layihələri əhatə edəcək özəlləşdirilmiş müəssisələrin 100-150 nümayəndəsinin müxtəlif seminar və treninqlərə cəlb edilməsi gözlənilir.