Sahibkarlıq

Ana səhifə

Sahibkarlıq

Azərbaycanda ötən il ticarət şəbəkəsindən hər bir ölkə sakini orta hesabla ayda 107 manatlıq mal alıb

23 yanvar 2009 09:24 (UTC +04:00)

Bakı. Nicat Mustafayev – APA-Economics. Azərbaycanın pərakəndə ticarət və iaşə şəbəkələrində 2008-ci il ərzində əhaliyə 10,876 mlrd. manatlıq və ya 2007-ci ildəkindən 16,1% çox istehlak malları satılıb və iaşə xidmətləri göstərilib.
Dövlət Statistika Komitəsindən «APA-Economics»ə verilən məlumata görə, hüquqi şəxs statuslu və hüquqi şəxs yaratmadan sahibkarlıq fəaliyyəti göstərən fərdi sahibkarların ticarət müəssisələrində pərakəndə əmtəə dövriyyəsinin real həcmi 2007-ci ilə nisbətən 24% artdığı halda, bazar və yarmarkalar üzrə bu artım 7,2% təşkil edib.
Pərakəndə əmtəə dövriyyəsinin ümumi artımının 78,9%-i ticarət müəssisələrinin, 21,1%-i isə yarmarka və bazarların ticarət fəaliyyəti sayəsində yaranıb.
Hesabat dövründə ticarət şəbəkəsindən hər bir ölkə sakini orta hesabla ayda 107,1 manatlıq və ya 2007-ci il ilə müqayisədə 31,5 manat çox müxtəlif istehlak malları alıb. Bu artım ticarət müəssisələrində 20,5 manat, bazar və yarmarkalarda 11 manat təşkil edib.
Son dövrlərdə alıcılıq qabiliyyətinin yüksəlməsi nəticəsində qeyri-ərzaq mallarının payının artmasının müşahidə olunmasına baxmayaraq, 2008-ci ildə pərakəndə əmtəə dövriyyəsinin ümumi həcmində ərzaq mallarının xüsusi çəkisi üstünlük təşkil etməkdə davam edərək 64,4% olub. Hesabat ilində əhaliyə 7,85 mlrd. manatlıq ərzaq, 3 867,5 mln. manatlıq qeyri-ərzaq malları satılıb, onların real həcmi uyğun olaraq 10,7% və 30% artıb.