Sahibkarlıq

Ana səhifə

Sahibkarlıq

USAID İcma Əlaqələri Proqramının növbəti mərhələsinə start verib

23 yanvar 2009 09:59 (UTC +04:00)

Bakı. Elnur Hüseynquluyev – APA-Economics. Bu gün ABŞ-ın Beynəlxalq İnkişaf Agentliyi (USAID) tərəfindən maliyyələşdirilən İcma Əlaqələri (Community Connections) Proqramı üzrə növbəti mübadilə mərhələsinə start verib. «APA-Economics»in məlumatına görə, bu ilki proqram üç hissədən ibarət olacaq ki, bura «İcmanın inkişafında QHT və bələdiyyələrin əməkdaşlığı», «Nəqliyyat təhlükəsizliyi» və «İqtisadi araşdırma mərkəzlərinin yaradılması, dəstəklənməsi və idarə olunması» komponentləri daxildir.
Yeni mərhələnin başlaması ilə bağlı keçirilən təqdimat mərasimində bildirilib ki, «İcmanın inkişafında QHT və bələdiyyələrin əməkdaşlığı» komponenti üzrə Gəncə, Şəmkir, Qazax və Xaçmazdan 8 peşəkar mütəxəssis seçilərək ABŞ-da üç həftəlik təcrübə keçmək imkanı əldə edəcək.
«Nəqliyyat təhlükəsizliyi» üzrə də 8 peşəkar mütəxəssisin seçilməsi və ABŞ-a üç həftəlik təcrübəyə göndərilməsi planlaşdırılır. Bu proqramda müxtəlif sahələrdən olan peşəkarlara ABŞ təcrübəsi əsasında avtomobillərin təhlükəsiz idarə olunması mədəniyyətinin formalaşması, ən yaxşı beynəlxalq təcrübə əsasında nəqliyyat təhlükəsizliyi üçün təşviqat və ictimai maarifləndirmə kampaniyalarının təşkili və inkişaf etdirilməsi öyrədiləcək.
«İqtisadi araşdırma mərkəzlərinin yaradılması, dəstəklənməsi və idarə olunması» kopmonenti üzrə isə iştirakçılara ABŞ-da biznes sahələrinin və hökumətin biznes və iqtisadi qərarlar verməkdə elmi araşdırma mərkəzlərinə necə etibar etmələri və güvənmə yolları təqdim olunacaq. İştirakçılar elmi araşdırma mərkəzlərinin iqtisadi siyasətin hazırlanmasında necə iştirak etdiyini, bu mərkəzlərin bitərəf araşdırmalarla təmin etmək və qiymətləndirmələr aparmaq vasitəsi ilə hökumətə necə yardımçı olduqlarını və araşdırma mərkəzlərinin necə davamlı müstəqil bir qruplara çevrilməyə nail olduqlarını görəcəklər. Bu proqram üzrə də 8 peşəkar mütəxəssisin seçilməsi və ABŞ-a üç həftəlik təcrübə keçmək üçün gёndərilməsi nəzərdə tutulur.
Tədbirdə iştirak edən proqramın ölkə üzrə Keri Kosbinin sözlərinə görə, İcma Əlaqələri Proqramı vasitəsi ilə ABŞ-a indiyədək 157, ötən il ərzində isə 36 azərbaycanlı mütəxəssis göndərilib.
Qeyd edək ki, İcma Əlaqələri Proqramı ABŞ ilə keçmiş SSRİ respublikaları arasında uzun müddət fəaliyyət göstərən ən böyük mübadilə və təlim proqramlarından biridir. Hazırda bu proqram 11 ölkədə fəaliyyət göstərir.