Sahibkarlıq

Ana səhifə

Sahibkarlıq

Azərbaycan parlamentinin vitse-spikeri özəl şirkətlərin nümayəndələri ilə görüşüb

23 yanvar 2009 14:11 (UTC +04:00)

Bakı. Aynur Vəliyeva – APA-Economics. Bu gün Bakıda Xəzər İnteqrasiya İşgüzar Klubunun (CIBC) üzvlərinin Azərbaycan parlamentinin vitse-spikeri Valeh Ələsgərovla görüşü keçirilib. «APA-Economics»in məlumatına görə, görüşdə özəl şirkətləri narahat edən bir sıra məsələ müzakirə olunub, milli vəkilləri onlara müəyyən tövsiyələr verib.
V.Ələsgərovun verdiyi məlumata görə, fevralın 2-də Milli Məclisin iclasında «Xüsusi iqtisadi rejiminin tətbiqi haqqında» qanun layihəsinə II oxunuşda baxılacaq və artıq yaxın vaxtlarda Azərbaycan şirkətlərinə yeni imkanlar verəcək bu qanunun təsdiqlənəcəyi gözlənilir.
Millət vəkili yerli şirkətlərə Azərbaycandan kənara, yeni bazarlara çıxmağı, bu baxımdan nisbətən kiçik layihələrdə iştirakdan imtina etməməyi tövsiyə edib.
Görüş zamanı vitse-spiker Türkmənistan qazının Avropaya ixracı perspektivləri ilə bağlı qeyd edib ki, qaza tələbatı olan ölkələr özləri bu istiqamətdə səy göstərməlidir. Və əgər Avropa Türkmənistanın qazı Çin və Rusiyaya deyil, məhz onlara satılmasını istəyirsə, digər ölkələrdən daha üstün təkliflər irəli sürməlidir və qəti tədbirlər həyata keçirərək qazın ixracı üçün real imkanlar yaratmalıdır: «Bütün bunlar Türkmənistanla yanaşı Azərbaycana və digər qaz ixracatçıları ilə bağlı məsələlərə də aiddir».
Yeni texnologiyaların tətbiqi imkanlarından danışan V.Ələsgərov qeyd edib ki, bu sahədə fəaliyyət göstərən müəssisə və təşkilatlara imtiyazların və ya dövlət dəstəyinin göstərilməsi yalnız o vaxt məqsədə uyğun olar ki, bu, inqilabi bir texnologiya olsun və öz müsbət tərəflərini istehsalda və ya digər sahələrdə göstərsin, onun kütləvi istifadəsinə ehtiyac olduğunu təsdiqləsin.
V.Ələsgərov əlavə edib ki, ümumiyyətlə bu il ərzində dövlət büdcəsi tərəfindən maliyyələşdirilən mühüm infrastruktur layihələri tam həyata keçiriləcək, o cümlədən İT xərclərinin ixtisara salınması gözlənilmir.
Sonda, vitse-spiker «Xüsusi iqtisadi rejiminin tətbiqi haqqında» qanunun parlamentdə təsdiqləndikdən sonra yeni analoji görüşünün təşkil edilməsinin vacibliyini vurğulayıb.