Sahibkarlıq

Ana səhifə

Sahibkarlıq

Bakıda Azərbaycan və Belarus sahibkarları arasında görüş keçirilir

03 fevral 2009 08:54 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan və Belarus sahibkarları arasında işgüzar görüş keçirilir.
«APA-Economics»in məlumatına görə, tədbirin açılış mərasimində ölkənin iqtisadi potensialından danışan Azərbaycan Ticarət və Sənaye Palatasının birinci vitse-prezidenti Niyaz Əlizadə qeyd edib ki, işgüzar görüşdə Azərbaycan tərəfindən 20-ə yaxın qeyri-neft sektorunda fəaliyyət göstərən şirkət iştirak edir: «Ümid edirəm ki, iki ölkənin sahibkarları arasında sıx əlaqə yaranacaq və yeni sahələrdə əməkdaşlığa başlanacaq».
Tədbirdə çıxış edən Belarus Ticarət və Sənaye Palatasının rəhbəri Nikolay Saxar qeyd edib ki, işgüzar görüşə Belarusun 11 şirkəti qatılıb. Belarusun iqtisadi inkişafından danışan N.Saxar həmçinin bildirib ki, Belarusda ötən il ərzində ümumi daxili məhsulun (ÜDM) artım tempi 10% təşkil edib, son 5 il ərzində isə ÜDM-in artım tempi 7-10% arasında olub.
«Azərbaycanla Belarus arasında həm idxal-ixrac əməliyyatları, həm də birgə investisiya layihələrinin həyata keçirilməsi iki ölkə arasında ticarət dövriyyəsini artırmaq imkanı yarada bilər. Ümid edirəm ki, işgüzar görüşlərin yekununda şirkətlər arasında bir sıra müqavilələr imzalanacaq», - deyə N.Saxar bildirib.
Tədbirdə çıxış edən Belarusun Azərbaycandakı səfiri Nikolay Patskeviç dünyada müşahidə olan maliyyə böhranından danışıb və qeyd edib ki, maliyyə böhranı bir sıra ölkələr üçün sınaq mərhələsidir, Azərbaycan və Belarus kimi ölkələr üçün isə inkişaf etmək üçün bir şansdır: «Hər iki ölkənin iqtisadiyyatı müsbət amilləri ilə seçilir. Belə ki, Azərbaycan bir sıra risklərdən özünü sığortalayıb və hazırda maliyyə böhranına baxmayaraq, bir neçə layihənin icrası həyata keçirilir. Belarus isə öz növbəsində yenidən kreditsiz işləmək təcrübəsini göstərdi. Ölkədə tərəfdaşlarımız azalsa belə, heç bir müəssisə fəaliyyətini dayandırmayıb».
Belarusun iqtisadi inkişafından danışan N.Patskeviç həmçinin qeyd edib ki, ötən il ərzində ölkəsinin xarici ticarət dövriyyəsinin 72 mlrd. ABŞ dolları təşkil edib və bunun 62 mlrd. dolları ÜDM-in payına düşüb.
N.Patskeviç həmçinin vurğulayıb ki, hazırda iki ölkə arasında ticarət dövriyyəsi 110 mln. dollar təşkil edir və gələcəkdə bu göstəricinin 500 mln. dollara çatdırılması planlaşdırılır.