Sahibkarlıq

Ana səhifə

Sahibkarlıq

Azərbaycan bazarında İran, Türkiyə və Rusiyada istehsal edilmiş, standartlara cavab verməyən qaz sobaları satılır

03 fevral 2009 13:46 (UTC +04:00)

Bakı. Rəşad Süleymanov – APA-Economics. Azərbaycan bazarında İranla yanaşı Türkiyə, Rusiya və digər ölkələrdə istehsal edilmiş, standartlara cavab verməyən qaz sobaları mövcuddur. «APA-Economics»in məlumatına görə, bu barədə Standartlaşdırma, Metrologiya və Patent üzrə Dövlət Komitəsi (SMPDK) qanunvericilik və hüquq ekspertizası şöbəsinin müdiri İbrahim Babayev məlumat verib.
İ.Babayevin sözlərinə görə, komitənin yanvarın 7-dən keçirdiyi monitorinq nəticəsində 143 ticarət obyektindən 30-da uyğunluq sertifikatı olmayan 23 adda məişət qaz cihazının satışı aşkarlanıb. Onların satışdan çıxarılması üçün müvafiq tapşırıqlar verilib. Monitorinqlər il ərzində davam edəcək.
Komitə rəsmisi bildirib ki, bu il SMPDK tərəfindən 8 şirkətin istehsalı olan qaz sobalarının ölkəyə gətirilməsi üçün uyğunluq sertifikatı verilib.
«Sertifikat verilmiş qaz sobaları Dövlət Komitəsi ilə yanaşı «Azəriqaz» QSC-nin laboratoriyalarında da sınaqdan keçirilib», - deyə komitə rəsmisi vurğulayıb.
İ.Babayevin sözlərinə görə, uyğunluq sertifikatı verilmiş qaz sobaları da qəzaya səbəb ola bilər. Bu da vətəndaşların həmin sobalardan istifadə qaydalarına riayət etməmələri, eləcə də müdaxilələri nəticəsində baş verə bilər.
Dövlət Komitəsinin şöbə müdiri həmçinin əlavə edib ki, bu günə qədər əhaliyə verilən qazın tərkibinin standartlara cavab verməməsi barədə fakt aşkarlanmayıb: «Əgər bununla bağlı müraciət olarsa, müxtəlif mənbələrdən götürülmüş qazın analizləri aparıla bilər».
SMPDK monitorinqlərin nəticəsi olaraq toplanan faktları Nazirlər Kabinetinə, Dövlət Gömrük Komitəsinə, Fövqəladə Hallar Nazirliyi və «Azəriqaz» QSC-yə təqdim edəcək.