Sahibkarlıq

Ana səhifə

Sahibkarlıq

Azərbaycan və Belarus sahibkarları arasında əməkdaşlığa dair bir sıra razılıq əldə olunub

04 fevral 2009 11:05 (UTC +04:00)

Bakı. Nicat Mustafayev – APA-Economics. Fevralın 3-də Bakıda Azərbaycan və Belarus sahibkarları arasında keçirilən görüşlər nəticəsində bir sıra razılıq əldə olunub. «APA-Economics»in məlumatına görə, bu gün ötən gün təşkil olunan görüşün yekunlarına dair Bakıda mətbuat konfransı keçirilib.
Tədbirdə çıxış edən Belarusun Azərbaycandakı səfiri Nikolay Patskeviç qeyd edib ki, Belarus iki ölkə arasında iqtisadi və digər sahələr üzrə əməkdaşlığın inkişafına böyük əhəmiyyət verir. N.Patskeviç həmçinin bildirib ki, yaxın iki ay ərzində Minskdə Belarus-Azərbaycan iqtisadi əməkdaşlıq üzrə hökumətlərarası iclasın keçirilməsi də planlaşdırılır.
Səfirin sözlərinə görə, əgər iki il öncə iki ölkə arasında ticarət dövriyyəsi 30 mln. ABŞ dolları təşkil edirdisə, hazırda bu rəqəm 111 mln. dollaradək artıb: «Əlbəttə, 2008-ci ildə ticarət dövriyyəsinin 120 mln. dollar olacağını düşünürdük, lakin maliyyə böhranı dövründə 111 mln. dollarlıq ticarət dövriyyəsinə nail olmaq elə də pis göstərici deyil. Azərbaycanla Belarus arasında ixrac-idxal əməliyyatları dinamikasının 2009-cu ildə ötən ilin səviyyəsində qalacağı ehtimal olunur».
Tədbirdə çıxış edən Belarus Ticarət və Sənaye Palatasının birinci müavini Nikolay Saxar qeyd edib ki, Bakıda iki ölkənin sahibkarları arasında keçirilən görüşlərin nəticəsi olaraq bir sıra razılıq əldə olunub. Belə ki, əvvəllər Azərbaycana Belarusdan ildə 25 min dollarlıq baytarlıq dərmanları gətirilirdisə, bu ildən etibarən bu həcmin 2 dəfə artırılmasına dair razılıq əldə olunub.
N.Saxar həmçinin qeyd edib ki, tərəflər arasında Belarusdan Azərbaycana süni dərilərin gətirilməsi, Azərbaycanda Belarus mebel müəssisəsinin açılmasına dair də ilkin razılıq əldə edilib.
Qeyd edək ki, iki ölkənin sahibkarları arasında fevralın 3-də Bakıda keçirilən işgüzar görüşdə 11 Belarus və 20 Azərbaycan şirkət və müəssisəsi iştirak edib.