Sənaye və energetika

Ana səhifə

Azərbaycan hökuməti Avropa İttifaqının energetika sahəsində islahatlara ayırdığı qrantın istifadəsi üzrə Tədbirlər Planını təsdiq edib

18 dekabr 2009 11:20 (UTC +04:00)

Bakı. Rəşad Süleymanov – APA-Economics. Nazirlər Kabineti Avropa İttifaqının (Aİ) Azərbaycana Energetika Sahəsində İslahatlara Dəstək Proqramı ilə bağlı ayırdığı 13 mln. avro məbləğində qrant vəsaitinin Proqramın məqsədlərinə istifadəsi üzrə Tədbirlər Planını təsdiq edib. Bu barədə «APA-Economics»ə Nazirlər Kabinetindən məlumat verilib.

Nazirlər Kabinetindən bildirilib ki, büdcəyə dəstək mexanizmi vasitəsilə həyata keçirilməsi nəzərdə tutulan Aİ-nin Energetika Sahəsində İslahatlara Dəstək Proqramı məhz bu məqsədlərə nail olmaq üçün hazırlanıb. Proqram müvafiq dövlət orqanları ilə razılaşdırılaraq, müvafiq qaydada imzalanıb və Nazirlər Kabinetinin 2009-cu il 8 aprel tarixli sərəncamı ilə təsdiq edilib. Tədbirlər Planının məqsəd və vəzifələrinə energetika sektorunda bazar iqtisadiyyatı prinsiplərinə uyğun hərtərəfli və kompleks strategiyanın hazırlanması, alternativ və bərpa olunan enerji mənbələrindən istifadənin və enerjinin səmərəli istifadəsinin artırılması və bununla bağlı müvafiq fəaliyyət planlarının hazırlanması və həyata keçirilməsi, alternativ və bərpa olunan enerji mənbələri və ümumi enerjidən səmərəli istifadə sahələrində qanunvericilik bazasının təkmilləşdirilməsi, Aİ qanunvericiliyinə uyğunlaşdırılması, həmçinin energetika sektorunda statistikanın dəqiqləşdirilməsi və s. daxildir.

Plana uyğun olaraq, Aİ-nin ayırdığı 13 mln. avro vəsaitdən Sənaye və Energetika Nazirliyinə (SEN) 2010-cu il üçün «Energetika Sahəsində İslahatlara Dəstək Proqramı» çərçivəsində texniki yardım və təchizat layihələrinin tender sənədlərinin hazırlanması üçün 300 min avro, 2010-2011-ci illərdə «Energetika Sahəsində İslahatlara Dəstək Proqramı»nın həyata keçirilməsinə dəstək layihəsininə (layihə çərçivsində enerji sektorunda hərtərəfli və kompleks inkişaf strategiyasının hazırlanması, alternativ və bərpa olunan enerji mənbələri (ABOEM) və enerjidən səmərəli istifadə üzrə tədbirlər planlarının hazırlanması və icrası, Energetika sahəsində Müstəqil Tənzimləyici Agentliyin yaradılmasının texniki-iqtisadi əsaslandırılmasının hazırlanması, SEN-in Alternativ və Bərpa Olunan Enerji Mənbələri üzrə Dövlət Agentliyinin fəaliyyətinə dəstək və s. nəzərdə tutulur) 5,45 mln. avro, 2010-2011-ci illər ərzində ABOEM-dən istifadənin və ESİ-nin genişlənməsinə dəstək layihəsinə 1 mln. avro, 2010-2011-ci illərdə Dövlət Statistika Komitəsinə energetika sahəsində rəsmi statistikanın təkmilləşdirilməsi üçün 250 min avro, Maliyyə Nazirliyinə bu dövrdə «Dövlət maliyyəsinin idarə olunmasının (DMİ) təkmilləşdirilməsinə dəstək Layihəsi» üzrə 1 mln. avro, SEN-ə 2011-2012-ci illərdə ABOEM və enerjidən səmərəli istifadə üzrə pilot investisiya layihələrinin həyata keçirilməsi üçün 5 mln. avro vəsait yönəldiləcək.