Sənaye və energetika

Ana səhifə

Ceyhan terminalında 1000-ci tanker Azərbaycan nefti ilə yüklənir

18 dekabr 2009 13:22 (UTC +04:00)

Bakı. Nicat Mustafayev – APA-Economics. Bu gün «BP-Azerbaijan» şirkətinin əməliyyatçısı olduğu Bakı-Tbilisi-Ceyhan (BTC) neft ixrac boru kəməri 1 000-ci tankeri Səngəçal terminalından Azərbaycan, Gürcüstan və Türkiyədən keçməklə Ceyhan terminalına ixrac edilən neftlə doldurmağa başlayıb.

Şirkətdən «APA-Economics»ə verilən məlumata görə, «British Kestrel» adlı 1 000-ci tanker Ceyhan terminalına dekabrın 17-də gəlib və doldurulduqdan sonra Rotterdama (Hollandiya) yola düşəcək.

Ceyhan terminalında 999-cu tankerlə eyni vaxtda yüklənən 1 000-ci tankerə təxminən 600 min barel xam neft vurulacaq. BTC vasitəsilə nəql olunan və Ceyhan terminalından dünya bazarlarına yola salınan neft əsasən Xəzər dənizinin Azərbaycan sektorundakı «Azəri-Çıraq-Günəşli» (AÇG) və «Şahdəniz» yataqlarından hasil edilir. Azərbaycan Dövlət Neft Şirkətinə (ARDNŞ) məxsus xam neftlə yüklənəcək «Bakı» gəmisi isə Ceyhandan yola salınan 1 001-ci tanker olacaq və həmin gəminin bu həftənin sonunda yola düşəcəyi gözlənilir.

Bu günədək BTC kəməri vasitəsilə ixrac edilən neftin ümumi həcmi təxminən 791 mln. barel (təxminən 106 mln. ton) olub. Hazırda BTC ilə gündəlik təxminən 850 min barel neft ixrac edilir. Bu günədək kəmər vasitəsilə ən yüksək gündəlik ixrac göstəricisi 1 006 505 barel olub.

Qeyd edək ki, BTC kəməri 2006-cı ilin iyul ayında istiyadəyə verilib. Kəmərin uzunluğu 1 768 km (onun 443 km Azərbaycan, 248 km Gürcüstan, 1 077 km isə Türkiyə ərazisindən keçir), illik nəqletmə gücü isə 50 mln. ton təşkil edir.

BTC-nin əsas səhmdarları sırasına BP (30,1%), «AzBTC» (25%), «Chevron» (8,90%), «StatoilHydro» (8,71%), TPAO (6,53%), ENI (5%), «Total» (5%), «Itochu» (3,40%); INPEX (2,50%), «ConocoPhillips» (2,50%) və «Hess» (2,36%) şirkətləri daxildir.