Sənaye və energetika

Ana səhifə

Azərbaycan Dövlət Neft Şirkəti bu il ekoloji layihələrə 50 mln. manatdan çox vəsait ayıracaq

26 yanvar 2010 11:39 (UTC +04:00)

Bakı. Rəşad Süleymanov – APA-Economics. Azərbaycan Dövlət Neft Şirkəti (ARDNŞ) cari ildə ekoloji layihələrin həyata keçirilməsinə 50 mln. manatdan çox vəsait ayırmağı planlaşdırır. «APA-Economics»in məlumatına görə bunu ARDNŞ-in vitse-prezidenti Muxtar Babayev «Interfax» agentliyinin ofisində keçirdiyi mətbuat konfransında bildirib.

M.Babayevin sözlərinə görə, şirkət tərəfindən ekoloji layihələrin həyata keçirilməsinə 2007-ci ildə 22 mln., 2008-ci ildə 28,5 mln., 2009-cu ildə 50 mln. manat vəsait yönəldilib.

«Layihələr müxtəlifdir. Bura atmosferə, ətraf mühitə atılan tullantıların azaldılması, neftlə çirklənmiş torpaqların bioloji təmizlənməsi, yaşıllaşdırma, dənizdəki köhnə platformaların sökülməsi və s. daxildir», - deyə şirkət nümayəndəsi vurğulayıb.

M.Babayev cari ildə 120 ha yaxın çirklənmiş sahənin mexaniki və bioloji təmizlənməsinin, 150 minə yaxın ağac və gül kollarının əkilməsinin nəzərdə tutulduğunu qeyd edib.

ARDNŞ rəsmisi hazırda Bakı şəhərinin Xətai rayonu ərazisində «Qara şəhər» adlanan massivdən neftayırma zavodlarının şəhərdən kənara köçürülməsi layihələri üzərində iş aparıldığını da bildirib: «Hazırda Dövlət Komissiyası təklifləri araşdırır. Hesab edirəm ki, şəhərdən kənarda yaradılacaq yeni neft-kimya kompleksi ölkənin neft və neft-kimya məhsullarına olan təlabatını tam ödəyəcək».

Şirkət nümayəndəsi bildirib ki, ekoloji proqram çərçivəsində bu günədək Bibiheybət ərazisində 230 ha neftlə çirklənmiş ərazi təmizlənib, orada 50 minə yaxın ağac və dekorativ kol əkilib.

M.Babayev atmosferə atılan qazların azaldılması ilə bağlı işlər barədə də danışıb. ARDNŞ rəsmisi bildirib ki, 4 il ərzində «Günəşli» yatağından 445 min ton, «Neft Daşları»ndan isə atmosferə atılan 162 min ton CO2 qazı xüsusi qurğu vasitəsi ilə tutulub. Bununla yanaşı neft emalı müəssisələrində 20 min ton çirkab suyu, 9 min ton neft şlamı yığılaraq zərərsizləşdirilib. Qurudakı yataqlarda lay sularının utilizasiyası həyata keçirilib və həmin sular təzyiqin saxlanılması üçün yenidən laylara vurulub.