Sənaye və energetika

Ana səhifə

Azərbaycan təbii qazını sıxılmış formada Avropaya ixrac etməyə hazırlaşır

26 yanvar 2010 12:04 (UTC +04:00)

«APA-Economics»in məlumatına görə, bunu BNE portalına (www.businessneweurope.eu) açılmasında Gürcüstanın energeğtika nazirinin birinci müavini Məryəm Valişvili deyib.

Onun sözlərinə görə, Azərbaycan ilə Rumıniya arasında sıxılmış qazın Qara Dəniz üzərindən Avropaya ixracının təşkili ilə bağlı müqavilə imzalanıb və bu layihənin həyata keçirilməsi üçün Gürcüstanda təbii qazın sıxılması zavodunun tikilməsinə ehtiyac var: «Biz yeni açılacaq bu dəhlizin bir hissəsi olmaqda maraqlıyıq. Sıxılma üçün Azərbaycandan təbii qazın çatdırılması hazırda Gürcüstanın qərbinə qazın nəql olunduğu Cənubi Qafqaz Qaz Boru Kəməri vasitəsi ilə həyata keçirilə bilər. Hazırda SSRİ dövründən qalan qaz xətlərinin reabilitasiyası həyata keçirilir. Burada ilkin gücü ildə 5-10 mlrd. kubmetr olan qazın sıxılması zavodu tikilməlidir».

M.Valişvili əlavə edib ki, sıxılmış qaz Gürcüstandan Rumıniyanın Konstansa limanına tankerlər vasitəsi ilə daşınacaq və artıq «Romgaz» şirkəti qəbul terminalının qurulması planı üzərində işləyir.

«Bu layihə hazırda ilkin mərhələdədir. Hələ rəsmi danışıqlar və tam texniki iqtisadi əsaslandırma aparılmalıdır. Əgər bütün məsələlər üzrə razılıq əldə olunarsa, gələcəkdə bu marşrutdan Xəzər hövzəsinin digər tədarükçülərinin, o cümlədən ixracını əsasən Rusiya vasitəsi ilə həyata keçirən Türkmənistanın da qazını ixrac edilməsi üçün istifadəsi mümkündür. Bu halda, sıxma zavodunun gücü 15-30 mlrd. kubmetrə qədər artırılmalıdır. Eyni zamanda, sıxılmış qaz Rumıniyadan digər ölkələrə də ixrac oluna bilər», - nazir müavini vurğulayıb.

Qeyd edək ki, boru kəmərləri ilə ixrac imkanlarını genişləndirməklə yanaşı tranzit xərci olmadığına və ARDNŞ-in Gürcüstanda Qara Dəniz sahilində Küləvi terminalına sahib olması səbəbindən Azərbaycan Avropaya təbii qazın sıxılmış formada ixracına maraq göstərir. Ötən ilin noyabr ayında prezident İlham Əliyevin rəhbərliyi ilə Azərbaycan nümayəndə heyətinin Bolqarıstana səfəri çərçivəsində Azərbaycan Sənaye və Energetika Nazirliyi ilə Bolqarıstan İqtisadiyyat, Energetika və Turizm Nazirliyi arasında energetika sektorunda əməkdaşlıq memorandumu imzalanıb. Memorandumda bir neçə istiqamət əsas götürülüb ki, bunlardan biri Azərbaycan təbii qazının sıxılmış vəziyyətdə Bolqarıstanın Varna liman şəhərinə nəqli, həmçinin «Cənub dəhlizi»nin reallaşdırılması məsələsi olub. Rumıniya tərəfi ilə də ilkin danışıqlar aparılıb.

ARDNŞ prezidenti Rövnəq Abdullayev bir qədər öncə bildirib ki, qeyd olunan layihə səmərəli hesab olunarsa, Azərbaycan tərəfi Kulevidə sıxılmış qaz terminalı tikəcək.