Sənaye və energetika

Ana səhifə

Gürcüstanın Dmanisi rayonunun gürcülər və azərbaycanlılar yaşayan iki kəndinə qaz verilib

03 fevral 2010 14:55 (UTC +04:00)

Dmanisi. Nizami Məmmədzadə - APA. Bu gün Dmanisi rayonunun gürcülər yaşayan Didi Dmanisi kəndində yeni qaz paylayıcı mərkəzin açılış mərasimi keçirilib.

APA-nın Gürcüstan bürosunun məlumatına görə, tədbir Gürcüstanın Energetika Nazirliyinin və “SOCAR-Energy Georgia” törəmə şirkətinin birgə həyata keçirdiyi üç illik proqram çərçivəsində baş tutub.

Mərasimdə Gürcüstanın energetika naziri Aleksandr Xetaquri, ARDNŞ-nin Gürcüstan nümayəndəliyinin rəhbəri Mahir Məmmədov, Kvemo-Kartli bölgə qubernatorunun müavini Zakariya Darçiaşvili, Dmanisi rayon İcra Hakimiyyətinin başçısı Bakur Mqeladze və digər rəsmi şəxslər iştirak edib. Tədbir 173 nəfər şagirdi olan Didi Dmanisi orta məktəbinə qaz verilmə prosesi ilə başlayıb. Qazpaylayıcı mərkəz 3 kəndi əhatə edir. Didi Dmanisi kəndində 120 abonent, Vardisubani kəndində 120 və Maşavera kəndində 350 abonent qazla təmin olunub.

Bu gün eyni zamanda Dmanisinin azərbaycanlılar yaşayan Dunus kəndində qazpaylayıcı mərkəzin açılışı olub. ARDNŞ-nin Gürcüstan nümayəndəliyinin rəhbəri Mahir Məmmədov və Gürcüstanın energetika naziri Aleksandr Xetaquri kənd sakini Oruc Hüseynovun evində kəndə çəkilmiş ilk qazın alovunu birlikdə müşayiət ediblər. Dunus kəndində açılmış qazpaylayıcı mərkəzdən 200 nəfər abonent qazdan istifadə edəcək.

Mahir Məmmədov jurnalistlərə bildirib ki, Gürcüstanda qazlaşdırma prosesi 2008-ci ilin dekabrın 26-da qəbul olunmuş proqram əsasında həyata keçirilir: “Bu, Dmanisiyə bizim ikinci gəlişimizdir. Bu ilin ortalarına qədər Dmanisinin ən ucqar kəndi olan Qomaretidə qazlaşdırma aparacağıq və bütövlükdə Dmanisi rayonunun qazlaşdırma proqramını sona çatdıracağıq. Biz Bolnisidə qaz disribütor mərkəzini Rusiyanın “İtera” şirkəti ilə birgə almışıq. Əsas işlərimizi həmin şirkətlə razılaşdırıb Bolnisi rayonunda qazlaşdırma işini 2010-2011-ci illərdə başa çatdıracağıq. Marneuli və Qardabani rayonunda qazlaşdırma dövlət proqramı əsasında həyata keçirilir. Bu il Marneuli rayonunun 6-7 kəndində qazlaşdırmaya başlayacağıq. Burada 4-5 min abonentimiz olacaq. Fevral ayında qazlaşdırmanın birinci təqvim ili başa çatır. Qazlaşdırmaya 20 mln. ABŞ dolları sərmayə qoymuşuq. Dövlət tərəfindən qazlaşdırma 40 mln. dollardır, lakin biz bununla kifayətlənməyib sərmayə qoyuluşunu 70 mln. dollara çatdıracağıq. 150 min abonentin böyük bir hissəsi Kvemo-Kartli bölgəsinə düşür. Ümumiyyətlə, 2010-cu ilin sonuna kimi 50 min abonent qazla təmin olunacaq”.

Gürcüstanın energetika naziri Aleksandr Xetaquri APA-ya bildirib ki, belə tədbirlərin sayəsində əhali olduqca ucuz yanacaq əldə edəcək və sosial-iqtisadi vəziyyəti yaxşılaşacaq: “Bizim məqsədimiz odur ki, əhali yaxşı yaşasın. Gürcüstan Azərbaycandan qazın 1 min kubmetrini 167 dollara alır və əhaliyə paylaşdırır. Biz Azərbaycandan il ərzində 1 mlrd. 10 mln. kubmetr qaz alırıq. Bizim Azərbaycanla uzunmüddətli müqaviləmiz var və iki dövlət arasında bu sahədə heç bir problem yoxdur”.