Sənaye və energetika

Ana səhifə

Bu ilin ilk yarısında ARDNŞ qaz təhvili proqnozunu 12% artıqlaması ilə yerinə yetirib

05 iyul 2010 08:50 (UTC +04:00)

Bakı. Nicat Mustafayev - APA-Economics. Bu ilin iyun ayı ərzində Azərbaycan Respublikası Dövlət Neft Şirkəti (ARDNŞ) ölkənin təbii qaz təchizatı sisteminə 827,783 mln. kubmetr mavi yanacaq verib.

ARDNŞ-dan «APA-Economics»ə verilən məlumata görə, ay ərzində yeraltı qaz anbarlarına 246,175 mln. kubmetr təbii qaz vurulub. Bununla da iyun ayı ərzində 581,608 mln. kubmetr qaz istifadə olunub. Bu həcmdən sənaye, əhali və «Azərenerji» ASC-nin istifadəsinə 456,032 mln. kubmetr təbii qaz verilib, Gürcüstana 11,511 mln. kubmetr, Rusiyaya 81,539 mln. kubmetr qaz ixrac olunub, Naxçıvanın qaz təminatı üçün isə İrana 32,526 mln. kubmetr mavi yanacaq ötürülüb.

Bununla yanaşı, ARDNŞ cari ilin ilk yarısında Azərbaycanın yanacaq-enerji balansında təbii qazın təhvili üzrə nəzərdə tutulmuş öhdəlikləri artıqlaması ilə yerinə yetirib. Belə ki, yanvar-iyun ayları ərzində ARDNŞ ölkənin təbii qaz təchizatı sisteminə 5 707,398 mln. kubmetr qaz verib ki, bu da proqnozda nəzərdə tutulandan 629,898 mln. kubmetr və ya 12,4% çoxdur.

Bundan başqa, ölkə sənayesinin, əhalinin təbii qazla tam təmin olunması və xaricə qazın ixracı ilə əlaqəli bağlanmış müqavilə öhdəliklərini yerinə yetirilməsi məqsədilə yeraltı qaz anbarlarından əlavə olaraq 630,926 mln. kubmetr qaz götürülüb. Bununla yanaşı, yeraltı qaz anbarlarına əlavə olaraq 566,352 mln. kubmetr qaz vurulub.

Beləliklə, 2010-cu ilin yanvar-iyun ayları ərzində 5 771,972 mln. kubmetr qaz istifadə olunub. Bu həcmdən sənaye, əhali və «Azərenerji» ASC-nin istifadəsinə 4 956,987 mln. kubmetr təbii qaz verilib, Gürcüstana 207,048 mln. kubmetr, Rusiyaya 428,213 mln. kubmetr qaz ixrac olunub, Naxçıvanın qaz təminatı üçün isə İrana 179,724 mln. kubmetr mavi yanacaq ötürülüb.