Sənaye və energetika

Ana səhifə

Bu il Azərbaycanda 52 mln. ton neft hasil olunacaq

07 iyul 2010 11:53 (UTC +04:00)

Bakı. Nicat Mustafayev - APA-Economics. Bu il Azərbaycanda 52 mln. ton neftin hasil olunacağı proqnozlaşdırılır.

«APA-Economics»in məlumatına görə, bunu Azərbaycanın sənaye və energetika naziri Natiq Əliyev bildirib.

Onun sözlərinə görə, hazırda Azərbaycan sutkada 1 mln. bareldən artıq neft hasil edir: «Biz artıq bu rəqəmi keçmişik və yaxın gələcəkdə bundan da artıq neft çıxaracağıq. Cari il ərzində Azərbaycanda 52 mln. tondan artıq neft hasil olunacağı gözlənilir».

Qaz hasilatına gəldikdə, nazir qeyd edib ki, hazırda ölkənin mavi yanacaq ehtiyatları 2 trln. kubmetrdən artıqdır: «Ötən il ərzində biz 23,6 mlrd. kubmetr qaz hasil etmişik. Hazırda Azərbaycan bir sıra perspektiv strukturlarda işlər aparır. Belə ki, «Babək» və «Ümid» strukturlarında kəşfiyyat işləri davam etdirilir, «Abşeron», «Naxçıvan», «Alov», «Şərq», «Zəfər» və digər strukturlarda da geoloji kəşfiyyat tədbirləri gələcəkdə görüləcək. İnanıram ki, Azərbaycanın qaz ehtiyatları saydığımızdan 2-3 dəfə çox olacaq».