Sosial

Ana səhifə

Sosial

Misir Mərdanov: “Maliyyə böhranı Azərbaycanın təhsil obyektlərinin təmir və tikintisi üçün ayrılan vəsaitlərin həcminə təsir edib”

27 aprel 2009 15:04 (UTC +04:00)

Gəncə. Cəmşid Bəxtiyar-APA Ümumdünya maliyyə böhranı Azərbaycanın təhsil obyektlərinin təmir və tikintisi üçün ayrılan vəsaitlərin həcminə təsir edib.
APA-nın qərb bürosunun xəbərinə görə, bu barədə Gəncədə jurnalistlərə açıqlamasında təhsil naziri Misir Mərdanov bildirib: “Məktəb binalarının, o cümlədən bağçaların təmiri ilə bağlı bəzi planlarımızın icrasını təxirə salmalı olacağıq. Çünki ayrılan vəsait o işlərin lazımı səviyyədə görülməsi üçün kifayət deyil. Maliyyə böhranı bizə, az da olsa, təsirini göstərir”.
Nazir ölkə üzrə sınaq imtahanlarında ən aşağı göstəricilər nümayiş etdirən məktəblərlə bağlı görüləcək tədbirlər barədə də danışıb: “Ən aşağı göstəricilər Gədəbəy, Şəmkir, Tovuz və cənub bölgəsindən olan bəzi rayonlara aiddir. Biz həmin rayonların təhsil şöbəsi müdirlərinə öz iradlarımızı artıq bildirmişik. Amma onların əsas imtahanlara qədər hələ vaxtları var. Əsas imtahanlar ərəfəsində nazirlikdə bir toplantı keçirməyi planlaşdırırıq. Orada lazımi göstərişlərimizi verdikdən sonra iyulun 1-ci yarısında keçiriləcək buraxılış imtahanlarının nəticələrini gözləyəcəyik. Ümumi tələblərlə ayaqlaşmayan məktəblərin rəhbərliyi ilə bağlı lazımi ölçülər götürməli olacağıq”.