Sosial

Ana səhifə

Sosial

Qətərin Sosial Təminat Təşkilatının nümayəndə heyəti Azərbaycana səfər edəcək

29 aprel 2009 09:10 (UTC +04:00)

Bakı. Rəşad Süleymanov – APA-Economics. Qətərin Azərbaycandakı səfiri Mübarək bin Fəhd Cəsim əl-Səni Dövlət Sosial Müdafiə Fondunda (DSMF) olub. Bu barədə «APA-Economics»ə DSMF-nin ictimaiyyətlə əlaqələr sektorunun müdiri Elman Babayev məlumat verib.
DSMF sədri Səlim Müslümov qonağı mərkəzləşdirilmiş idarəetmə, fərdi uçotun avtomatlaşdırılması sistemləri, tədris otağı, sosial sığorta şəhadətnamələrinin çapı mərkəzi, müasir avadanlıqla təchiz olunmuş arxivlə yaxından tanış edib. Sığorta-pensiya sahəsində həyata keçirilən islahatlardan danışan S.Müslümov vurğulayıb ki, əhalinin pensiya təminatının qabaqcıl beynəlxalq təcrübə əsasında yenidən qurulması ölkəmizdə həyata keçirilən sosial-iqtisadi siyasətin strateji istiqamətlərindəndir. Azərbaycanda 2006-cı ildən yeni, beynəlxalq təcrübədə özünü doğrultmuş üçpilləli struktura əsaslanan əmək pensiyaları sisteminin fəaliyyətdə olduğunu deyən S.Müslümov bu sistemin fəaliyyəti dövründə əmək pensiyalarının istər minimal məbləği (baza hissəsi), istərsə də orta aylıq məbləğinin əhəmiyyətli şəkildə artdığını qeyd edib.
S.Müslümov bildirib ki, hazırda Azərbaycanda sığorta-pensiya sisteminin növbəti mərhələsini özündə əks etdirən Azərbaycanda sığorta-pensiya sisteminin inkişafına dair Dövlət Proqramının (2009-2015-ci illər) icrasına başlanılıb. Proqramın icrası nəticəsində sığorta-pensiya sisteminin işinin tam avtomatlaşdırılmış qaydada təşkili və onu çalışdıracaq kadr potensialının formalaşdırılmasına, fərdi uçotun və xüsusilə də sığortaolunanların məlumatlandırılması sisteminin inkişafına nail olunacaq. Məcburi dövlət sosial sığorta haqları hesabına ödənilən müavinətlərin təyin olunması və uçotunun avtomatlaşdırılması da qarşıda duran əsas vəzifələrdəndir. Bu məsələnin həlli üçün artıq kifayət qədər iş görülüb, avtomatlaşdırılmış iş yerləri və proqram təminatı hazırlanıb. Hazırda sistemin pilot ərazilərdə tətbiqi həyata keçirilir.
Diplomat isə Azərbaycanda sığorta-pensiya sistemi sahəsində həyata keçirilən islahatların onda böyük maraq doğurduğunu vurğulayıb. Qətərin Azərbaycan təcrübəsinin öyrənilməsi və tətbiqi üçün müəyyən addımların atılmasına çalışacağını nəzərə çatdırıb. Səfir qeyd edib ki, o, Azərbaycan təcrübəsinin öyrənilməsi məqsədi ilə Qətərin Sosial Təminat Təşkilatının nümayəndə heyətinin Bakıya səfər etməsi üçün iş aparacaq.