Sosial

Ana səhifə

Sosial

Fövqəladə Hallar Nazirliyinin Akademiyasında təhsil almaq istəyənlərin sənəd qəbulu başlayır

31 mart 2010 10:58 (UTC +04:00)

Bakı. Rəşad Süleymanov – APA. Aprelin 1-dən Azərbaycan Fövqəladə Hallar Nazirliyinin (FHN) Akademiyasında təhsil almaq istəyən vətəndaşların sənəd qəbuluna başlayır. APA-nın FHN-in veb-saytına istinadən verdiyi məlumata görə, sənədlərin qəbulu aprelin 30-dək davam edəcək.

Akademiyaya qəbul olmaq istəyən namizədlər – boyu azı 160 sm, tam orta təhsilli və ya orta məktəbin buraxlış sinfində oxuyan 16 yaşından yuxarı (“Fövqəladə hallar və həyat fəaliyyətinin təhlükəsizliyi mühəndisliyi” ixtisası üzrə isə 01.09.2010-cu il tarixinədək 17 yaşı tamam olan) yaxud, müddətli həqiqi hərbi xidmət keçmiş və ehtiyatda olan 23 yaşınadək Azərbaycan vətəndaşları sırasından seçilirlər. Namizədlər FFN tərəfindən müəyyən edilmiş qaydalara müvafiq olaraq nazirliyin xüsusi həkim ekspertiza komissiyasından, həmçinin, fiziki hazırlıq və seçmə komissiyalarında sınaq və yoxlamalardan keçməlidirlər.

Sınaq və yoxlamalardan müvəffəqiyyətlə keçən abituriyentlərin ərizələri rəsmiləşdirilir və onlar Tələbə Qəbulu üzrə Dövlət Komissiyası tərəfindən müəyyən edilmiş cədvəl üzrə mərkəzləşdirilmiş qaydada keçirilən test imtahanlarında iştirak edirlər. Qəbul imtahanı I ixtisas qrupuna daxil olan fənlər üzrə keçirilir.

Akademiyaya qəbul olunan şəxslər təhsil müddətində yemək, xüsusi geyim forması və yataqxana ilə təmin olunur və təqaüd alırlar. Təhsil müddəti 4 ildir. Akademiyanın məzunlarına “Yanğın təhlükəsizliyi mühəndisliyi”, “Fövqəladə hallar və həyat fəaliyyətinin təhlükəsizliyi mühəndisliyi” ixtisasları üzrə bakalavr dərəcəsi, hərbi və ya xüsusi rütbələr verilir, onlar FHN sistemində müvafiq vəzifələrə təyin edilirlər.

Sənədlər Fövqəladə Hallar Nazirliyinin Akademiyasında (Bakı şəhəri, Hövsan qəsəbəsi, Elman Qasımov küçəsi) qəbul olunur.