Sosial

Ana səhifə

Sosial

“Azəriqaz” Almaniyadan alınan qaz sayğaclarını əhali abunəçilərinin mənzillərində quraşdırıb

31 mart 2010 15:13 (UTC +04:00)

Bakı. Rəşad Süleymanov – APA-Economics. Azərbaycan Dövlət Neft Şirkətinin (ARDNŞ) “Azəriqaz” İB Qazsazlama İdarəsi tərəfindən cari ilin yanvar-mart aylarında Almaniyadan alınan 41 888 məişət qaz sayğacından 32 058-i yoxlamadan keçirilərək dövlət vəsaiti hesabına əhali abunəçilərinin mənzillərində quraşdırılıb. Bu barədə «APA-Economics»ə ARDNŞ-dən məlumat verilib.

Hesabat dövründə sifarişlər əsasında idarə tərəfindən 134 ədəd diafraqma dəyişdirilib, 66 ədəd ölçü qovşağı üçün hesabat vərəqələri hazırlanaraq təsdiqlənib. Həmçinin 380 cihazda yaranan sönmə halları aradan qaldırılıb. Bununla yanaşı, ölçü qovşaqlarına və cihazlara mütəmadi texniki xidmət göstərilib. İdarənin “Sənaye obyektlərinin qaz sayğaclarına xidmət” Sahəsi tərəfindən respublika ərazisində qazdan istifadə edən sənaye obyektlərində müqavilə əsasında 250 ədəd qaz sayğacı quraşdırılıb və həmin cihazlara texniki xidmət göstərilib.

İdarənin sınaq mərkəzində yeni istismara verilən LJQM-100, UPC-16, Combikal-1600 və BPG-500 tipli unikal stendlər vasitəsi ilə məişət və sənaye qaz sayğaclarını müasir standartlara uyğun olaraq dövlət yoxlamasından keçirmək mümkündür. Bu avadanlıqlar sənaye, kommunal və məişət istehlakçılarına məxsus qaz sərfölçmə cihazlarının, tənzimləyicilərin, avtomatik qazpaylayıcı stansiyaların və digər nəzarət-ölçü cihazlarının metroloji təminatına və onların sınaqdan keçirilməsinə imkan verir. Burada il ərzində 330 ölçü qovşağına texniki xidmət göstərilir. Müasir texnologiyaların tətbiqi nəticəsində hər ayın sonunda Bakı şəhəri və respublikanın 6 istiqaməti üzrə aylıq göstəricilər elektron tipli “ROC-407” cihazlarından və sayğaclardan yığılaraq, emal edilir. Təhlil və hesabatların nəticələri əsasında aylıq qaz sərfi hesablanır və balans tərtib olunur. Artıq buradakı avadanlıqlar hesabına təbii və səmt qazının hesabatının ayrı-ayrılıqda və yüksək dəqiqliklə aparılması, normadan artıq itkilərin qarşısının alınması məqsədi ilə qazın qəbul nöqtələrindən ayda 3 dəfə nümunələrin götürülüb xramatoqraf üsulu ilə təhlil olunması mümkündür. Bu üsulla qazın fraksiyalarının (CO2 və O2) faizlə miqdarı dəqiq təyin olunur və qısa müddət ərzində elektron tipli cihazların yaddaşına daxil edilir.