Sosial

Ana səhifə

Sosial

Azərbaycanda rəsmi işsizlərin sayı 38,3 minə düşüb

23 yanvar 2012 14:17 (UTC +04:00)

Bakı. Nicat Mustafayev – APA-Economics. Bu ilin yanvarın 1-i vəziyyətinə Azərbaycanda iqtisadi fəal əhalinin sayı 4 626,1 min nəfər olub ki, onlardan 4 375,2 min nəfərini iqtisadiyyatın və sosial bölmənin müxtəlif sahələrində məşğul olan əhali təşkil edib.

Dövlət Statistika Komitəsindən «APA-Economics»ə verilən məlumata görə, 2011-ci ilin yanvar-noyabr aylarında məşğul əhalinin tərkib hissəsi olan muzdla işləyənlərin siyahı sayı 1 366,9 min nəfər, orta siyahı sayı isə 1 360,1 min nəfər, o cümlədən iqtisadiyyatın dövlət bölməsində 851,9 min nəfər, qeyri-dövlət bölməsində isə 508,2 min nəfər təşkil edib. Bununla yanaşı, iqtisadiyyatın neft sektorunda 36,4 min nəfər, qeyri-neft sektorunda isə 1 323,7 min nəfər çalışıb. Muzdla işləyənlərin tərkibində qeyri-kənd təsərrüfatı sahəsində əmək fəaliyyəti ilə məşğul olanlar 1 320,3 min nəfər təşkil edib.

«Cari ilin yanvarın 1-i vəziyyətinə məşğulluq xidməti orqanları tərəfindən ölkə üzrə rəsmi işsiz statusu verilmiş şəxslərin sayı 38,3 min nəfər olub ki, ötən ilin əvvəli ilə müqayisədə bu göstərici 1,5% azalıb. Onların 43%-ni qadınlar təşkil edib. Hər bir boş iş yerinə (vakansiyaya) işsiz statusuna malik olanların 3 nəfəri düşüb. İşsizliyə görə müavinətin orta məbləği 190,4 manat olub», - deyə Komitədən bildirilib.