Sosial

Ana səhifə

Sosial

Bayıl yamacındakı sürüşmə ilə əlaqədar araşdırma aparan yapon mütəxəssislərindən ibarət qrup Azərbaycana gəlib

25 yanvar 2012 14:33 (UTC +04:00)

Bakı. Kəmalə Quliyeva – APA. Bayıl yamacındakı sürüşmə ilə əlaqədar araşdırma aparan yapon mütəxəssislərindən ibarət qrup Azərbaycana gəlib. APA-nın məlumatına görə, onlar Bayıl yamacındakı sürüşmə ilə bağlı apardıqları araşdırmalardan ibarət layihəni bu gün Azərbaycanın əlaqədar dövlət qurumlarına təqdim ediblər. Lakin hələlik Bayıl yamacındakı sürüşmə ilə əlaqədar yaradılan İşçi Qrup layihəni müzakirə eləməyib.
Yapon mütəxəssislərin sabahdan başlayaraq hazırladıqları layihə ilə bağlı müzakirələr aparacaqları gözlənilir. Qrup Azərbaycanda bir neçə gün qalacaq. Müzakirələr başa çatandan sonra Azərbaycanın müvafiq dövlət qurumlarının iştirakı ilə sürüşmənin qarşısını almaq üçün tədbirlər planı hazırlanacaq.

Qeyd edək ki, Bayıl yamacındakı sürüşmə ilə əlaqədar ərazidə araşdırma aparan yapon mütəxəssislər burada 3 sürüşmə müstəvisi aşkarlayıblar. Ötən ay onlar Bayıl yamacında apardıqları araşdırmaların nəticələrini daha dəqiq analiz etmək üçün Yaponiyaya aparmışdılar.
Bayıl yamacındakı sürüşməni nəzarətdə saxlamaq üçün yapon mütəxəssislərinin təklifi ilə quyular qazılıb. Quyulara həssas ötürücülər olan avadanlıqlar qoyulub. Ərazidə baş verən dəyişikliklər monitorinq sistemi vasitəsilə hər 15 dəqiqədən bir Fövqəladə Hallar Nazirliyində yerləşən mərkəzə ötürülür.
Xatırladaq ki, bu il avqustun 18-də Bayıl yamacında yenidən sürüşmə təhlükəsi yaranıb. Təhlükə zonası “Əbədi məşəl” kompleksinin yaxınlığından “Gülüstan” sarayına doğru uzanan ərazini əhatə edir. Ərazidə kiçik çatlar əmələ gəlib.

sürüşmə