Asiya

Ana səhifə

Asiya

İraq Türkiyə ilə bağlı BMT Təhlükəsizlik Şurasını təcili toplantıya çağırıb

06 oktyabr 2016 13:23 (UTC +04:00)

Bakı - APA. İraq mərkəzi hökuməti və Türkiyə arasında gərginlik artır.

APA-nın "milliyet.com.tr" saytina istinadən verdiyi məlumata görə, İraq Xarici İşlər Nazirliyi Türkiyə ilə bağlı BMT Təhlükəsizlik Şurasını təcili toplantıya çağırıb.

İraq Xarici İşlər Nazirliyi ölkənin şimalındakı Başika düşərgəsində Türkiyə hərbçilərinin mövcudluğunu ölkənin suverenliyinin pozulması kimi qiymətləndirib və Ankaranı İraqın daxili işlərinə qarışmaqda günahlandırıb. İraq BMT Təhlükəsizlik Şurasında Türkiyənin Mosul yaxınlığındakı Başika düşərgəsindəki hərbi qüvvəsinin mövcudluğu və iki gün əvvəl Türkiyə parlamentinin ölkə sərhədlərindən kənarda hərbi əməliyyatların aparılması ilə bağlı qərarının müzakirə olunmasını istəyib. Bir gün öncə isə İraq parlamenti Başika düşərgəsindəki Türkiyə hərbi qüvvələrini işğalçı kimi dəyərləndirən qərar qəbul edib. Parlament hökuməti Türkiyə hərbi qüvvəsinin İraqdan çıxarılması üçün təcili BMT Təhlükəsizlik Şurasına müraciət etməyə çağırıb.

Türkiyənin baş naziri Binəli Yıldırım isə Türkiyə hərbi qüvvələrinin İraqda qalmağa davam edəcəyini bildirib. B. Yıldırım deyib ki, Ankara Mosul şəhərinin İŞİD terrorçularından təmizlənməsi ilə bağlı ABŞ, İran hökuməti və Mosulda yerli tayfalardan yaradılan könüllülərlə birgə çalışır. Baş nazir Başika düşərgəsindəki türk hərbçilərinin könülülərə və kürd peşmərgələrə təlim keçdiyini söyləyib. O, Mosulun İŞİD terrorçularından təmizlənməsi əməliyyatının başlayacağı ərəfədə İraq mərkəzi hökumətinin reaksiyasının anlaşılmaz olduğunu vurğulayıb: "İraqda 63 ölkənin hərbçisi var. PKK terror təşkilatının məskunlaşdığı İraqda bu günə qədər İraq mərkəzi hökuməti hər hansı adım atmayıb. İraq hökumətinin niyyəti yaxşı deyil. Türkiyə hərbi qüvvələri İraqda qalmağa davam edəcək. Bizim məqsədimiz bölgədə daha çox insan dramının yaşanmamasıdır. Belə tələb irəli sürmək İraq hökumətinin həddi deyil. Türkiyə terrorla mübarizədə yeni səhifə açıb”.

B. Yıldırım bu gün Türkiyə Təhlükəsizlik Şurasının toplantısının keçiriləcəyini də açıqlayıb.

Qeyd edək ki, Türkiyənin Mosul yaxınlığındakı Başika düşərgəsində 500-ə qədər hərçbisi var. Şimali İraqın müxtəlif bölgələri də daxil olmaqla, İraqda ümumilikdə 2 minə qədər türk əsgəri var.