Turizm

Ana səhifə

Turizm

Azərbaycanda turizm sahəsində kadr hazırlığına həsr olunmuş müşavirə keçirilib

12 iyul 2012 11:39 (UTC +04:00)

Bakı. Ülkər Rəşidqızı – APA. Bu gün Bakı Turizm Peşə Məktəbində «Turizm sahəsində kadr hazırlığı: nailiyyətlər, problemlər və əsas vəzifələr» mövzusunda müşavirə keçirilib.

APA-nın məlumatına görə, müşavirədə çıxış edən mədəniyyət və turizm naziri Əbülfəs Qarayev turizm sahəsində əldə olunan nailiyyətlərdən, inkişafdan və hazırkı proseslərdən danışıb. Nazir qeyd edib ki, Azərbaycanda 2006-cı ildən fəaliyyət göstərən Turizm İnstitutunda tədris proqramı məşhur Krems Universitetinin proqramına uyğun həyata keçirilir: «Turizm İnstitutu Azərbaycanda nadir institutlardan biridir ki, Avropanın ən məşhur universitetləri ilə rəqabət aparır. Hazırda müşavirənin keçirildiyi bu peşə məktəbi səviyyəli xidmətlər təqdim edir».

Ə.Qarayev bildirib ki, Turizm İnstitutunun məzunları qısa zaman ərzində iş tapırlar: «İnstitutun məzunlarının 90%-i işlə təmin olunur. Artıq tələbələr və şagirdlər uğrunda şirkətlər arasında rəqabət gedir. Bu, qeyri-sağlam bir tendensiyadır. Mehmanxanalar bir-biri ilə rəqabəti həmin işçilər üzərində həyata keçirir. Digər tərəfdən bu, sevindirir, çönki bu gənclərin təhsil və iş bacarığı mehmanxanaların marağındadır. Bu sahədə çalışanların sayının son 5 ildə artması da bunu təsdiq edir. Eyni zamanda, Azərbaycana gələn turistlərin sayının artması da düzgün qurulmuş işin nəticəsidir».

Nazir qeyd edib ki, turizm sahəsi üzrə təhsil alan tələbələrin xaricdə təcrübə keçməsinə imkan yaradılıb. Bu sahədə planların çox olduğunu deyən Ə.Qarayev turizm sektorunun inkişafının dövlətin daim diqqətində olduğunu vurğulayıb.