Turizm

Ana səhifə

Turizm

Bakıda "İpək Yolunun tamı: Kulinariya, Mədəniyyət və Turizm" mövzusunda beynəlxalq konfrans keçirilir - FOTOSESSİYA

Bakıda "İpək Yolunun tamı: Kulinariya, Mədəniyyət və Turizm" mövzusunda beynəlxalq konfrans keçirilir - <font color=red>FOTOSESSİYA</font>

06 sentyabr 2012 08:48 (UTC +04:00)

APA-nın məlumatına görə, konfransda Ümumdünya Turizm Təşkilatının baş katibi Taleb Rifai, İranın vitse-prezidenti, Mədəni İrs, Turizm və İncəsənət Təşkilatının rəhbəri Həsən Musəvi, Ümumdünya Ticarət Təşkilatının məruzəçiləri, ekspertləri, Qırğızıstan, Qazaxıstan, Gürcüstan, Litva və Pakistandan nazir və nazir müavinləri səviyyəsində qonaqlar, İspaniya, Koreya, Rusiya, Bolqarıstan, İsveçrə, Belçika, İtaliya, Türkiyə, Böyük Britaniya, Özbəkistan, Tailand, Fransa, Almaniya və Çinin turizm təşkilatlarının nümayəndələri iştirak edir.

Konfrans iştirakçılarını salamlayan Azərbaycanın mədəniyyət və turizm naziri Əbülfəs Qarayev bildirib ki, əsrlər boyu tarixi İpək Yolu Şərq və Qərb arasında mədəniyyət, ideya, texnologiya və insan mübadiləsində mühüm rol oynayıb: “28 ölkənin üzv olduğu İpək Yolu Proqramının məqsədi birgə səylərlə İpək Yolu boyunca turizmi davamlı inkişaf etdirməkdən ibarətdir. Artıq Azərbaycanın Ümumdünya Turizm Təşkilatında öz yeri və nüfuzu var. Azərbaycanda çoxsaylı beynəlxalq festivalların və tədbirlərin keçirilməsi bunun bariz nümunəsidir. Bu konfransda Azərbaycan və ona qonşu olan ölkələrin mətbəxi, turizmi və digər ənənələri nümayiş etdirilir, ölkələr arasında əməkdaşlıqlar qurulur”.

Nazir qeyd edib ki, bu ilin sonuna qədər Azərbaycanda xüsusiləşdirilmiş turizm konfransı keçiriləcək ki, bu da dünya turizminə öz töhfəsini verəcək.

Ümumdünya Ticarət Təşkilatının baş katibi Taleb Rifai Azərbaycanın ev sahibliyi etdiyi beynəlxalq konfransın əhəmiyyətindən danışaraq, bu tədbiri ölkələrin tanıdılması baxımdan önəmli sayıb. İranın vitse-prezidenti, Mədəni İrs, Turizm və İncəsənət Təşkilatının rəhbəri Həsən Musəvi tədbirin yüksək səviyyədə təşkilinə görə şad olduğunu söyləyib: “İran hər zaman turizmə xüsusi diqqət ayırıb və bizim ölkədə bu proses kifayət qədər güclü gedir. Ötən il ərzində ölkəmizə 3 milyon turist gəlibsə, bu say 2012-ci ilin sonuna qədər 7 milyon təşkil edəcək. Bu da kifayət qədər artım deməkdir və bizi sevindirir. İranda əsasən halal nemətlər satılır ki, bu da qeyd olunası bir faktdır”.

Qeyd edək ki, tədbirin ilk günü "Qida və turizm: Qlobal meyllər və imkanlar", "İpək Yolunun kulinariya məkanlarının aparıcı şəbəkəsi kimi qurulması" və "İnkişaf üçün qida" mövzularında sessiyalar təşkil edilib.

Tədbirin ikinci günü, yəni sentyabrın 7-də "İpək Yolu qlobal səyahət mediasında" və "Rəqəmsal dövr: Sosial media və səyahət" mövzularında dəyirmi masalar keçiriləcək. Konfrans çərçivəsində Azərbaycan və Türkiyə mətbəxlərinin təqdimatı və ustad dərsləri təşkil olunacaq, Azərbaycan və Gürcüstan istehsalı olan şərabların dequstasiyası keçiriləcək.