Turizm

Ana səhifə

Turizm

Əbülfəs Qarayev Azərbaycan Turizm İnstitutunda keçirilən “Bilik günü”ndə iştirak edib

17 sentyabr 2012 08:33 (UTC +04:00)

Bakı. Ülkər Rəşidqızı-APA. Azərbaycan Turizm İnstitutunda (ATİ) 2012/2013-cü tədris ilinin başlanması münasibəti ilə “Bilik günü” qeyd edilib. APA-nın məlumatına görə, tədbirdə mədəniyyət və turizm naziri Əbülfəs Qarayev, ATİ-yə yeni qəbul olunmuş tələbələr və onların valideynləri, həmçinin qonaq qismində bir sıra dövlət rəsmiləri iştirak ediblər.

Mərasimdə çıxış edən ATİ-nin rektoru Cəfər Cəfərov bildirib ki, bu il ATİ-yə yalnız bakalavr pilləsi üzrə 386 nəfər qəbul olub və bütün plan yerləri tam dolub. Rektor onu da qeyd edib ki, ATİ-yə qəbul planına görə əslində 336 nəfərin qəbulu nəzərdə tutulub, lakin Nazirlər Kabineti dövlət sifarişi ilə plan yerini 50 nəfər artırıb, beləliklə də instituta 10 ixtisas üzrə 386 nəfər tələbə qəbul olunub. ATİ-yə qəbul olmuş tələbələrin 248-i dövlət sifarişi əsasında, 138-i isə ödənişli əsaslarla təhsil alacaq. Tələbələrdən 28 nəfəri məcburi köçkündür. Azərbaycan sektoruna 326, rus sektoruna isə 55 tələbə qəbul olub. Qəbul olanların yarıdan çoxu qəbul imtahanlarında 400-dən yuxarı bal toplayıb. İki tələbə 600-dən çox bal toplayıb, balı 250-dən az olan tələbələrin sayı isə cəmi 5 nəfərdir.

Rektor həmçinin 2012/2013-cü tədris ilində ATİ-də mövcud təhsil pillələrinin hamısı üzrə qəbul prosesinin davam etdiyini söyləyib. Belə ki, hazırda ilkin peşə təhsili üzrə ATİ nəzdində Bakı Turizm Peşə Məktəbində təsdiq edilmiş plana əsasən 11 ixtisas üzrə 400 plan yerinə 448 nəfər sənəd təqdim edib. Həmçinin magistratura pilləsində 69 plan yeri üzrə qeydiyyat davam etdirilib, doktorantura üzrə qəbulun isə cari ilin sonunda keçirilməsi nəzərdə tutulur.

Hazırda ATİ-nin 2 korpusunda 1500-dən çox bakalavr tələbə təhsili alır. Ümumilikdə isə ATİ-də təhsilin bütün səviyyələrində 2000-dən çox şəxs turizm sahəsi üzrə kadr kimi hazırlanır. Mədəniyyət və turizm naziri Əbülfəs Qarayev gəncləri tələbə adını qazanmaları münasibəti ilə təbrik edib. ATİ-nin uğurlarından bəhs edən nazir institutun ali təhsil ocağı kimi ölkədə öz yeri və dəsti-xəttinin olduğunu qeyd edib, ATİ-də oxumağın çətin, lakin məzun olduqdan sonra iş tapmağın asan olduğunu vurğulayıb.

Nazir bildirib ki, hazırda ATİ-nin 498 məzunu ölkəmizin turizm sənayesinin inkişafı üçün uğurla çalışır, yeni açılan beşulduzlu hotellərdə, digər turizm obyektlərində beynəlxalq səviyyəli peşəkar kadrlar kimi özlərini təsdiq edirlər. ATİ Avstriyanın İMC Krems Tətbiqi Elmlər Universiteti ilə sıx əməkdaşlığını uğurla davam etdirir və həyata keçirilən birgə proqram çərçivəsində bu günədək institutun 57 məzunu ikili diplom alıb. Cari tədris ilindən ölkədə ilk dəfə olaraq ATİ-də ikili təhsil sistemi ilə magistratura proqramı da təşkil ediləcək.