Turizm

Ana səhifə

Turizm

Parisdə keçirilən “Top Resa 2012” beynəlxalq turizm sərgisində ermənilər tərəfindən Qarabağ stendinin nümayişinə icazə verilməyib - FOTO

Parisdə keçirilən “Top Resa 2012” beynəlxalq turizm sərgisində ermənilər tərəfindən Qarabağ stendinin nümayişinə icazə verilməyib - <font color=red>FOTO</font>

20 sentyabr 2012 14:29 (UTC +04:00)

Bakı. Ülkər Rəşidqızı-APA. Parisdə keçirilən “Top Resa 2012” beynəlxalq turizm sərgisində ermənilər “Qarabağ travel” adlı şirkətlə təmsil olunublar. Parisdə səfərdə olan Mədəniyyət və Turizm Nazirliyinin mətbuat katibi Zöhrə Əliyeva APA-ya açıqlamasında bildirib ki, Azərbaycan artıq bir neçə ildir ki, sözügedən sərgidə təmsil olunur və birinci iştirak zamanı ermənilər bu sərgidə Qarabağ stendi nümayiş etdiriblər: “Biz o zaman buna etirazımızı bildirmişdik və stendin götürülməsinə nail olmuşduq. Azərbaycan Mədəniyyət və Turizm Nazirliyinin müraciəti, eyni zamanda Azərbaycanın Fransadakı səfirliyinin etirazları ilə bu stend yığışdırılmışdı. O zamandan bəri həm Mədəniyyət və Turizm Nazirliyi, həm də Azərbaycan Səfirliyi daima bu məsələni diqqətdə saxlayır. Biz də bu məsələdən ehtiyat edərək, artıq əvvəlcədən tədbirlər görmüşdük. Sizə bildirmək istərdim ki, ermənilər bu dəfə də sərgidə ayrıca Dağlıq Qarabağ stendi ilə çıxış etmək arzusunda idilər, lakin biz və səfirliyimiz buna etiraz səsimizi ucaltdıq və onlar bu istəklərini həyata keçirə bilmədilər. Bu stendin əvəzinə “Qarabağ travel” adlı lövhə yerləşdirdilər”.

Z.Əliyeva bildirib ki, “Qarabağ travel”in yığışdırılmasını da sərgi təşkilatçılarından tələb etsələr də, onlar bunun mümkünsüzlüyünü deyiblər: “Sərginin təşkilatçılarına bununla bağlı iradımızı bildirdik, lakin bizə deyildi ki, biz daha buna irad bildirə bilmərik, çünki ayrıca stendə icazə verməmişik. Guya bu şirkətdir, onlar o prinsiplə yanaşırlar ki, şirkətə istədikləri adı verə bilərlər. Ermənilərin “Qarabağ travel” lövhəsi çox kasıb idi və heç kimin nəzərini cəlb etmirdi. Azərbaycan stendində Qarabağla – Şuşa, Xankəndi və digər işğal altında olan torpaqlarımızla bağlı xüsusi məlumatlar, xəritələr, disklər, albomlar nümayiş etdirilir və sərgi iştirakçılarına təqdim olunur”.

Sərgidə nümayiş olunan “Qarabağ travel”in azərbaycanlılar tərəfindən dağıdılması ilə bağlı Ermənistan mətbuatında yazılanlara gəlincə, Zöhrə Əliyeva bunun kökündən yalan olduğunu deyib və ermənilərin növbəti təxribatı kimi qiymətləndirib: “Erməni mətbuatının azərbaycanlılar tərəfindən stend dağılması yazıları kökündən yalandır. Azərbaycan nümayəndə heyətinin üzvləri, bütün azərbaycanlılar yüksək mədəniyyətə malikdir və bütün beynəlxalq qanunları çox gözəl bilirlər. Bu ermənilərin növbəti təxribatları və yalanlarıdır. Biz bu yazılarla bağlı təşkilatçılara da məlumat verdik və onlar kəskin şəkildə etirazlarını bildirdilər. Belə bir şey qəti şəkildə olmayıb və olması da mümkün deyil”.

Sərgidə iştirak edən Azərbaycan nümayəndə heyətinin tərkibinə Mədəniyyət və Turizm Nazirliyinin Turizm şöbəsinin müdir müavini Rauf Paşayev, Turizmin marketinqi və təbliğatı sektorunun aparıcı məsləhətçisi Leyla Verdiyeva, Nazirliyin mətbuat katibi Zöhrə Əliyeva, Bakı Turizm İnformasiya Mərkəzinin direktoru Zakir Əliyev və "Azərbaycan Televiziya və Radio Verilişləri" QSC-nin 2 əməkdaşı daxildir.

Sərgidə 4 yerli turizm şirkəti - "Geo Travel", "Gilan Tourism", "Millennium Tourism and Congress DMC" və "SW travel" şirkətləri təmsil olunur. Adıçəkilən sərgidə respublikamızın turizm imkanlarını əks etdirən 71.25 kv.m sahədə lövhə quraşdırılıb, həmçinin lövhədə "Azərbaycan Hava Yolları" aviaşirkəti üçün xüsusi yer ayrılıb. Sərgiyə gələn ziyarətçi və iştirakçılara ingilis və fransız dillərində müxtəlif növ reklam-çap məhsulları, eləcə də digər təbliğat materialları paylanır.