Turizm

Ana səhifə

Turizm

Azərbaycanın regionlarında saxta ulduzlarla fəaliyyət göstərən mehmanxanalar aşkarlanıb

28 sentyabr 2012 11:36 (UTC +04:00)

Bakı. Ülkər Rəşidqızı - APA-Economics. Azərbaycanın regionlarında bir neçə mehmanxananın saxta ulduz altında fəaliyyət göstərdiyi üzə çıxıb.

“APA-Economics”in məlumatına görə, Mədəniyyət və Turizm Nazirliyinin turizm şöbəsinin müdiri Aydın İsmiyev bu saxtakarlığın yay mövsümü müddətində aparılan monitorinqlər nəticəsində ortaya çıxdığını deyib.

Şöbə müdiri bildirib ki, ulduz dərəcəsinin müddəti bitmiş, lakin ondan istifadə edən 18 mehmanxana, ulduz dərəcəsi aşağı olduğu halda, yuxarı ulduz kateqoriyası təqdim edən 5 mehmanxana, ümumiyyətlə, ulduz dərəcəsi olmayan, lakin ondan istifadə edən 6 mehmanxana müvafiq qanunvericiliyə zidd olaraq fəaliyyət göstərir. A.İsmiyev təəssüflə qeyd edib ki, regionlarda fəaliyyət göstərən obyektlərin əksəriyyəti çox primitiv şəkildə yaradılıb və müasir standartlara cavab vermirlər: “Monitorinqlər zamanı məlum olub ki, sahibkarlar tərəfindən mövsümün başlanması ilə bağlı reklam və təşviqat işi zəif aparılır. Bir çox mehmanxana və ona bərabər tutulan yerləşdirmə obyektlərinin sahiblərinə dəfələrlə müraciət olunmasına baxmayaraq, lisenziyasız fəaliyyət göstərirlər. Bunun da səbəblərini araşdırda məlum olur ki, problemlər sənədlərin çatışmazlığından qaynaqlanır. Bölgələrdə fəaliyyət göstərən yerləşdirmə obyektlərinin əksəriyyətində çalışanların peşə hazırlığı demək olar ki, yox səviyyəsindədir, turistlərin istirahətlərinin səmərəli keçməsi üçün çox az sayda obyektlərdə əlavə xidmətlər təklif olunur, mehmanxana və ona bərabər tutulan yerləşdirmə obyektlərinin sahiblərində idarəetmənin öyrənilməsi səviyyəsi çox aşağıdır, yerləşdirmə obyektlərində müştərilərə reklam, çap məhsulları təşviq olunmur, online bronlaşdırma sistemindən və yeni elektron texnologiya vasitələrindən istifadənin səviyyəsi çox aşağıdır. Ümumilikdə baxış keçirilən bölgələrdə fəaliyyət göstərən yerləşdirmə obyektlərindən şimal regionu üzrə 36%, cənub üzrə 30%, şimal-qərb üzrə 60%, qərb üzrə isə 40% müasir dövrün tələblərinə və müvafiq standartlara cavab verir. Eyni zamanda nazirlik mütəmadi olaraq təşkil etdiyi treninq-kurslara iştirakçıların cəlb olunması zamanı böyük çətinliklərlə qarşılaşır. Obyekt rəhbərləri əməkdaşlarını kurslara cəlb etməklə onların peşə hazırlığının artırılmasına, bununla da obyektdəki xidmət səviyyəsinin yaxşılaşdırılmasına maraq göstərirlər. Nəticədə xidmət səviyyəsinin aşağı olması yerli və xarici turistlərin haqlı narazılığına səbəb olur”.

A.İsmiyev əlavə edib ki, qeyd olunanlar problemin həlli istiqamətində birinci amildir. İkinci amil isə turistlərə xidmət sahəsində peşə təhsili ocaqlarının hələ də formalaşmamasından ibarətdir.