Turizm

Ana səhifə

Turizm

Azərbaycandakı hotellərin gəlirləri son bir ildə 37% artıb

18 oktyabr 2012 09:24 (UTC +04:00)

Bakı. Nicat Mustafayev – APA-Economics. Bu ilin yanvar-iyun ayları ərzində Azərbaycanda 14 780 vahid nömrəsi (otağı), 31 850 çarpayı-yer birdəfəlik tutumu olan 506 mehmanxana fəaliyyət göstərib.

Dövlət Statistika Komitəsindən «APA-Economics»ə verilən məlumata görə, birdəfəlik tutumun 9 790-ı Bakı şəhərindəki mehmanxanalarda, 22 060-ı isə ölkənin digər rayon və şəhərlərindəki mehmanxanalarda mövcuddur.

«Bu dövrdə mehmanxanalarda yerləşdirilmiş şəxslərin sayı 2011-ci ilin müvafiq dövrü ilə müqayisədə 48,2% artaraq 296,4 min nəfər olub ki, onların da 60,9%-i xarici ölkə vətəndaşları olub. Ölkədə beynəlxalq səviyyəli tədbirlərin keçirilməsi və turizm infrastrukturunun sürətli inkişafı nəticəsində mehmanxanaların xidmətlərindən istifadə edən xarici ölkə vətəndaşlarının sayında daha çox artım müşahidə olunub. Belə ki, mehmanxanalarda gecələyən əcnəbilərin sayı ötən ilin müvafiq dövrü ilə müqayisədə 70,7% və ya 74,7 min nəfər artaraq 180,5 min nəfər olub. Yerləşdirilmiş Azərbaycan vətəndaşlarının sayı 23% artaraq 115,9 min nəfər olub. Mehmanxanalarda qalan qonaqların 27,6 min nəfəri (9,3%-i) turizm yollayışları ilə gələn turistlər olub», - deyə Komitədən bildirilib.

Hesabat dövründə mehmanxanalarda keçirilən gecələmələrin sayı ötən ilin müvafiq dövrü ilə müqayisədə 20,5% artaraq 612,3 min adam-gecə təşkil edib. Gecələmələrin 51,2%-i xarici ölkə vətəndaşlarının payına düşüb. Ümumi gecələmələrin 60,4%-i Bakı şəhərində, qalan hissəsi isə ölkənin digər rayonlarda (şəhərlərdə) qeydə alınıb.

Mehmanxana və mehmanxana tipli müəssisələrdə müvəqqəti yerləşmə üzrə xidmət göstərilən şəxslərin əsas hissəsi (84,6%-i) turizm məqsədilə səfər edənlər olub. Turistlərin 40,2%-i istirahət və əyləncə, 50,3%-i işgüzar və qalanları digər turizm məqsədilə səfər edib: «Bakı, Naxçıvan MR, Quba, Şəki, Xaçmaz, Şamaxı, Masallı, Qəbələ, İsmayıllı, Abşeron, Sumqayıt şəhəri və Lənkəran rayonlarına istirahət etmək məqsədilə səfər edən turistlərin sayı digər rayon və şəhərlərlə müqayisədə daha çox olub. Turizm məqsədilə səfər edən ölkə vətəndaşlarının 57,3%-ni Bakı şəhərinin sakinləri təşkil edib».

Ötən ilin müvafiq dövrü ilə müqayisədə bu dövrdə mehmanxana və mehmanxana tipli müəssisələrin əldə etdikləri gəlir 36,9% artaraq 68,8 mln. manat olub. Gəlirlərin 75,2%-i nömrələrin satışından, 15,4%-i içkilər də daxil olmaqla qida məhsullarının satışından, qalanı isə digər xidmətlərin göstərilməsindən əldə edilib. Mehmanxanalarda çalışan işçilərin orta siyahı sayı ötən ilin müvafiq dövrü ilə müqayisədə 697 nəfər artaraq 6 013 nəfərə çatmışdır. Bir işçiyə düşən orta aylıq əmək haqqının məbləği 317 manat təşkil edib.