Turizm

Ana səhifə

Turizm

CEİBC üzvləri Mədəniyyət və Turizm Nazirliyinin şöbən müdiri Aydın İsmiyevlə görüşüb

05 noyabr 2012 14:17 (UTC +04:00)

Bakı. Ülkər Rəşidqızı - APA. Bu gün Bakıda Xəzər-Avropa İnteqrasiya İşgüzar Klubunun (CEİBC) üzvləri Mədəniyyət və Turizm Nazirliyinin Turizm şöbəsinin müdiri Aydın İsmiyevlə görüşüb.

APA-nın məlumatına görə, klubun prezidenti Telman Əliyev ilk əvvəl rəhbərlik etdiyi qurumun fəaliyyəti ilə bağlı məlumat verib.

O bildirib ki, təmsil etdiyi qurum 2002-ci ilin iyun ayında yaradılıb və klubun fəxri sədri prezident İlham Əliyevdir. Klubun əsas məqsədi özəl sektor və dövlət qurumları arasında əlaqə yaratmaq, neft sektorundan əldə olunan gəlirləri qeyri-neft sektoruna cəlb etməkdir. T.Əliyev turizm şirkətlərinin bu sahə ilə bağlı bəzi təkliflərini də açıqlayıb.

Azərbaycanda turizmin yeni sahə olduğunu vurğulayan A.İsmiyev deyib ki, bu sahə ölkədə son 6-7 ildə inkişaf edib: “Bu müddətdə böyük nailiyyətlər əldə edilib. Əgər 2006-cı ildə ölkədəki mehmanxanaların sayı 288 idisə, hazırda onların sayı 508-dir”. A.İsmiyev turizm şirkətlərini maraqlandıran suallara da cavab verib. Nazirlik rəsmisinin sözlərinə görə, hər bir inkişaf etmiş olan ölkələrdə turizm sahəsi 20-40 ilə inkişaf edir. Türkiyədə 1968-ci ildən turizm inkişaf etdirilir.

A.İsmiyev onu da əlavə edib ki, Azərbaycanda aviabiletlərin qiyməti ucuz olmasa da, satış yaxşıdır: “Uçuş qiymətləri, əlbəttə, heç də aşağı deyil, amma bayram günlərindən yay turizm mövsümlərində təyyarələrdə yer qıtlığı olur. Qurban bayram günlərində Bakı-Paris, Bakı İstanbul reyslərində boş yerlər az olub. Qrup şəklində hansısa turizm şirkətləri turist gətirirsə, onlara endirim olmalıdır və belə endirimlər də olur”.

Tədbirin sonunda A.İsmiyevə və Nazirlər Kabineti yanında Bakı Bulvar İdarəsinin rəis müavini Nazim Məcidova klubun fəxri üzvü diplomu təqdim edilib.