Bakı. Ülkər Rəşidqızı – APA. Bu gün “Skal İnternational Baku” Klubunun növbəti, 12-ci toplantısı keçirilib. APA-nın məlumatına görə, əvvəlcə “Skal İnternational” Beynəlxalq Assosiasiyası haqqında film nümayiş etdirilib. “Skal İnternational Baku” Klubunun prezidenti Ruslan Quliyev qurumun fəaliyyəti və 2012-ci ildə gördüyü işlər haqqında geniş məlumat verib. Bildirib ki, 2009-cu il oktyabrın 8-də Bakıda “Hillside” otelində Mədəniyyət və Turizm Nazirliyinin rəsmi dəstəyi ilə açılışı keçirilmiş “Skal İnternational Baku” Azərbaycanda ilk turizm professionallarının təşkilatıdır. Keçmiş sovet ölkələri arasında ilk təşkilat olan bu qurumun vasitəsilə bütün dünyaya Azərbaycanın turizm potensialını təqdim etmək mümkündür ki, bu da öz növbəsində ölkədə turizmin inkişafına kömək edir. Təşkilat fəaliyyət göstərdiyi qısa müddətdə dünya turizm sahəsində keçirilən tədbirlərdə fəal iştirak etmiş və bundan sonra da ölkəmizin turizm potensialını dünya turizm bazarında layiqincə nümayiş etdirəcək. Mədəniyyət və Turizm Nazirliyinin sektor müdiri Vüqar Şıxəmmədov tədbirin əhəmiyyətindən, ölkədə turizmin sürətlə inkişaf etməsindən, bu sahədə dövlət proqramlarının uğurla həyata keçirildiyindən danışıb, nazirliyin “Skal İnternational Baku”ya hər zaman rəsmi dəstək verməyə hazır olduğunu bildirib.
Toplantıda “Evimiz Azərbaycan” jurnalının strukturu təqdim edilib və əlavə edilib ki, ölkədə daxili turizmin inkişafı və onun yüksək dünya standartları səviyyəsinə çatdırılması kimi hədəflər nəzərə alınaraq Mədəniyyət və Turizm Nazirliyinin dəstəyi ilə Azərbaycanda turizm imkanları, turizm sektoru və onun inkişafına həsr olunmuş belə bir jurnalın nəşrinə başlanılır.
Jurnalın baş redaktoru Sevil Zeynalqızı tədbirdə çıxışı zamanı jurnalın 18 - “Tur-imkan”, “Reytinq”, “İnfrastrukturizm”, “İstiqamət”, “Xidmət”, “Biznes turizmi”, “Peşəkar”, “Bilmək lazımdır”, İstirahət mərkəzi”, “Xəbərlər", “Bir gün Azərbaycanda”, “Kənardan baxış” “Turbiznes” və s. rubrikalardan ibarət olduğunu deyib.
Tədbir iştirakçılarına www.azerbaijanbooking.com saytı, tədbirin baş tutduğu məkan – 62 nömrədən ibarət “Divan Express Baku” mehmanxanası da təqdim edilib. Sonda “Skal İnternational Baku” Klubu ilə əməkdaşlıq edən turizm şirkətləri, mütəxəssislər və media mənsublarına təşəkkürnamələr təqdim edilib.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
