Amerika

Ana səhifə

Amerika

Hüsni Mübarəkin məhkəməsi Qahirədə olacaq

29 iyul 2011 00:41 (UTC +04:00)

Bakı-APA. Misir hökumətinin nümayəndələri bildiriblər ki, nümayişçilərə qarşı atəş açmaq əmri verdiyi sübut olunarsa, Mübarəki edam gözləyir.
APA-nın bbc.com saytına istinadən verdiyi xəbərə görə, Misirin keçmiş prezidenti Hüsni Mübarəkin məhkəməsi paytaxt Qahirədə keçiriləcək.
Misirin səhiyyə naziri deyib ki, hazırda Şarm-əl-Şeyx şəhərindəki xəstəxanada göz altında saxlanılan Mübarəkin səhhəti onun paytaxta gətirilməsinə imkan verir.
Nazir Qahirə Konfrans Mərkəzində zalın gələn həftə başlayacaq məhkəmə üçün hazırlandığını bildirib.
Mübarək korrupsiyada və onun istefasını tələb edən nümayişlər zamanı insanların öldürülməsində ittiham olunur.
Onun səhhətinin ağır olması barədə məlumatlar məhkəməsinin təxirə salınacağı və ya Şarm-əl-Şeyxdə keçiriləcəyi barədə spekulyasiyalar yaradıb.
Hüsni Mübarək nümayişlərdən sonra fevral ayında vəzifəsindən devrilib.
Məhkəmənin avqustun 3-də başlayacağı gözlənilir.
Mübarəkdən başqa onun iki oğlu - Alaa və Gamal, eləcə də keçmiş daxili işlər naziri Həbib əl-Ədli də məhkəmə qarşısına çıxarılacaq. Bu barədə ədliyyə rəsmisi xəbər verib.
"Keçmiş prezident Hüsni Mübarək və onun iki oğlu Alaa və Gamalın məhkəməsini İnvestisiya Baş Hakimiyyətinin idarəsində keçirmək qərarı verilib" - yerli qəzet rəsmi mənbəyə istinadən bu xəbəri yayıb.
83 yaşlı Hüsni Mübarək öz qüvvələrinə hökumət əleyhinə nümayişçilərini güllələmək əmri verməkdə, vəzifəsindən sui-istifadə etməkdə və vəsaitləri mənimsəməkdə ittiham olunur.
Ədliyyə rəsmisi deyib ki, ilk ittihamla bağlı müqəssir bilinərsə, onu edam cəzası gözləyir.