Asiya

Ana səhifə

Asiya

Türk hərbi təyyarəsi Suriya tərəfindən vurulub - YENİLƏNİB

Türk hərbi təyyarəsi Suriya tərəfindən vurulub - <font color=red>YENİLƏNİB</font>

22 iyun 2012 23:56 (UTC +04:00)

Bakı-APA. Suriya Hava hücumundan müdafiə qüvvələri Türkiyəyə məxsus F-4 qırıcı təyyarəsini ölkənin ərazi sularının üzərindən uçarkən vurublar. APA-nın RİA Novosti-yə istinadən verdiyi məlumata görə, bu barədə Suriya hərbi komandanlığı məlumat verib.

«Bizim HƏM sistemimiz cümə günü günorta saatlarında ərazi sularımızın üzərindəki hava məkanına daxil olan hədəfə hücum edərək onu vurub. Hədəf türk hərbi təyyarəsi olub», deyə Suriya hərbçilərinin məlumatında bildirilir.

Bir müddət öncə isə, Türkiyəyə məxsus qırıcı təyyarənin Aralıq dənizində yoxa çıxması ilə əlaqədar baş nazir Rəcəb Tayyib Ərdoğanın sədrliyi ilə təhlükəsizlik müşavirəsi keçirilib. İki saatdan çox davam edən müşavirədən sonra verilən yazılı açıqlamada, təyyarənin Suriya tərəfindən vurulduğu bəyan edilib.

Müşavirədə Baş qərargah rəisi Necdət Özəl, xarici işlər naziri Əhməd Davudoğlu, daxili işlər naziri İdris Naim Şahin, müdafiə naziri İsmət Yılmaz, Hava Qoşunları Komandanı Mehmet Ertən və MİT rəhbəri Hakan Fidan iştirak ediblər.

Açıqlamada pilotların axtarış-xilasetmə işlərinin davam etdiyi də bildirilib.

«Türkiyə hadisənin təfərrüatlarının tamamilə müəyyən edilməsindən sonra qəti mövqeyini nümayiş etdirəcək, zəruri addımları qətiyyətlə atacaq», deyə açıqlamada bəyan olunur.

Xatırlaqaq ki, türk döyüş təyyarəsi dünən gündüz saatlarında Aralıq dənizi üzərində Hatay vilayəti yaxınlığında yoxa çıxıb. F-4E Phantom tipli təyyarə Malatyadan havaya qalxıb. Bir neçə saat öncə isə təyyarə ilə əlaqə kəsilib. Türkiyə baş naziri Rəcəb Tayyib Ərdoğanın verdiyi məlumata görə bölgədə hərbi gəmilər və helikopterlərlə axtarış həyata keçirilir.