Avropa

Ana səhifə

Avropa

Fransa kiberhücuma görə İranın səfirini XİN-ə çağırıb - YENİLƏNİB

10 noyabr 2026 14:54 (UTC +04:00)

Fransa bu gün İranın Parisdəki səfirini kiberhücum iddiaları ilə əlaqədar Xarici İşlər Nazirliyinə çağırıb.

Bu barədə “Reuters” məlumat yayıb.

Məlumata görə, Fransa İranı ölkədə yüzlərlə supermarketdə soyuducuların fəaliyyətini dayandıran kiberhücumda ittiham edib.

Fransanın xarici işlər naziri Jan-Noel Barro bildirib ki, Paris bu hücuma cavab olaraq özünün kiber vasitələrindən istifadə edə bilər.

Qeyd edək ki, oktyabrın 11-dən 12-nə keçən gecə Fransanın müxtəlif bölgələrində yüzlərlə supermarket SEPAH-ın rəqəmsal bölməsi ilə əlaqəli olduğu ehtimal edilən kiberhücuma məruz qalıb. Hücum nəticəsində mağazaların soyuducu sistemlərinin fəaliyyəti pozulub və saxlanılan ərzaq məhsulları xarab olub. Bəzi mağazalar yüz minlərlə avro məbləğində zərərlə üzləşdiklərini açıqlayıblar.

12:09

Fransa kiberhücumla əlaqədar İrana qarşı sanksiyalar tətbiq edəcək.

APA xəbər verir ki, bunu Fransanın xarici işlər naziri Jan-Noel Barro bəyan edib.

Nazir bildirib ki, Paris İranın İslam İnqilabı Keşikçiləri Korpusunun (SEPAH) kiberhücumda əli olduğunu hesab edir və bu hadisəyə cavab olaraq bütün zəruri tədbirləri görmək niyyətindədir.

“Biz heç bir variantı istisna etmirik. Yeni hücumların qarşısını almaq və bu yolverilməz təcavüzə görə məsuliyyət daşıyanları cəzalandırmaq üçün özümüzün mütənasib və zəruri hesab etdiyimiz bütün tədbirləri, o cümlədən ictimaiyyətə açıqlamayacağımız addımları atacağıq”, – Barro vurğulayıb.

O əlavə edib ki, Fransa Xarici İşlər Nazirliyi etirazını bildirmək üçün İranın Parisdəki səfirini çağırmağı planlaşdırır.

Bundan başqa, Fransa kiberhücuma görə məsuliyyət daşıyan şəxslərə qarşı Avropa İttifaqı səviyyəsində sanksiyaların tətbiqinə çalışacaq. Bu tədbirlər həmin şəxslərin Avropa ərazisinə girişinin qadağan edilməsini, bank hesablarının və maliyyə aktivlərinin dondurulmasını əhatə edə bilər.