Hadisə

Ana səhifə

Hadisə

14 yaşlı qızı öldürüb anasını yaralamaqda təqsirləndirilən şəxsin məhkəməsi başlayır

20 may 2023 14:47 (UTC +04:00)

Bakıda yeniyetməni öldürüb, anasına xəsarət yetirməkdə ittiham olunan Zaur Babayevin cinayət işi üzrə ibtidai istintaq başa çatıb.

APA xəbər verir ki, toplanmış materiallar baxılması üçün Bakı Ağır Cinayətlər Məhkəməsinə göndərilib.

İş hakim Leyla Əsgərova-Məmmədovanın sədrliyi ilə araşdırılacaq.

Qeyd edək ki, hadisə bu ilin fevral ayında Sabunçu rayonunda qeydə alınıb.

Fevralın 2-si saat 01 radələrində Sabunçu rayonu ərazisində 2009-cu il təvəllüdlü Günay Şadatovanın xəstəxanada ölməsi barədə rayon prokurorluğuna məlumat daxil olub.

İlkin araşdırma zamanı Zaur Babayevin bıçaqla 1980-ci il təvəllüdlü Əfsanə Şadatova və onun qızı Günay Şadatovaya xəsarət yetirməsi və sonuncunun aldığı xəsarətdən xəstəxanada ölməsinə əsaslı şübhələr müəyyən edilib.

Daxili İşlər Nazirliyinin yaydığı məlumatda deyilir ki, cinayətdə şübhəli bilinən Zaur Babayev zərərçəkmiş Əfsanə Şadatova ilə qeyri-rəsmi münasibətdə olub.

Zaur Babayevə qarşı Cinayət Məcəlləsinin 120.2.4-cü ( xüsusi amansızlıqla adam öldürmə) maddəsi ilə ittiham irəli sürülüb. O, verilmiş ittihamla təqsirli bilinərsə 14 ildən 20 ilə və ya ömürlük azadlıqdan məhrum edilə bilər.