Daxili siyasət

Ana səhifə

Daxili siyasət

Əli Kərimli: “Son seçkidə kimlərin konstruktiv müxalifət kimi müəyyənləşdirilmiş standartlara uyğunlaşdığını gördük”

11 noyabr 2008 10:36 (UTC +04:00)

Bakı. Elnur Məmmədli - APA. “Biz ölkənin real demokratik qüvvələrini bir araya gətirmək üçün vaxt itirməməliyik. Nə qədər tez yüksək inteqrasiyaya nail olsaq, tərəfdarlarımızın gözləntilərini o qədər tez doğrultmuş olar və birlikdə real fəaliyyətə başlaya bilərik. Amma eyni zamanda hadisələri süni şəkildə tələsdirməməliyik. Hazırda siyasi qüvvələr arasında məsləhətləşmələr gedir. Bu proses nə qədər vaxt tələb edirsə, o qədər də gözləmək lazımdır. Əgər hansısa qüvvələr bir az da düşünmək istəyirsə, buna səbirlə yanaşılmalıdır. Əsas məsələ nəticə əldə etməkdir. Mən ümidvaram ki, biz nəticə əldə edəcəyik”. Bu sözləri APA-ya müsahibəsində Azərbaycan Xalq Cəbhəsi Partiyasının (AXCP) sədri Əli Kərimli deyib.

AXCP sədri Müxalifətin Əməkdaşlıq Mərkəzinin (MƏM) formatının genişlənməsi və funksional əməkdaşlıqdan strukturlaşmış birliyə çevrilməklə bağlı təklifinin Müsavat tərəfindən qəbul edilməməsi ilə bağlı suala cavabında isə bildirib ki, o, hazırda formatın genişləndirilməsində israr etməyib: “Əgər Müsavat Partiyası və ya Klassik Xalq Cəbhəsi Partiyası bizim birliyimizə qoşulmaq istəsə, bu yaxşı olardı. Amma bizimlə seçkilərə münasibətdə oxşar mövqe ifadə edən, eyni prinsipləri bölüşən başqa siyasi təşkilat tapmaqda çətinlik çəkirəm. Ona görə də bu birliyi süni şəkildə, kəmiyyət dalınca qaçaraq genişləndirməyi hədəf kimi qarşıya qoymağı düzgün hesab etmirəm. Əlbəttə, həyatda dinamika, dəyişiklik var, ola bilsin ki, bu gün yanlış mövqedə olan, tərəddüd edən siyasi qüvvələr bir müddətdən sonra daha birmənalı siyasi kurs seçəcəklər. O zaman bizim də əməkdaşlıq üçün qapılarımız həmin qüvvələrin üzünə açıq olmalıdır. Yəni biz qapalı bir format yaratmırıq. Son prezident seçkilərində həqiqəti deyə bilən əsas qüvvələri əhatə etmişik. Mənim təklifim bu qüvvələrin daha da sıx inteqrasiyasına nail olmaqla bağlıdır. Biz düz edib ilkin addımı funksional əməkdaşlıqdan başladıq. Amma bu bizim tələbatımızı tam ödəyə bilməz. Ona görə də hesab edirəm ki, əməkdaşlığı dərinləşdirməliyik və açıq şəkildə bəyan etməliyik ki, hətta qarşıdan gələn bələdiyyə və parlament seçkilərinə vahid seçki blokunda getmək barədə düşünürük. Mən bu məsələdə Müsavat Partiyasının birmənalı etirazına rast gəlməmişəm. Ayrı-ayrı funksionerlərin fikirləri ilə mətbuatda tanış olmuşam, amma partiyanın əməkdaşlığın dərinləşdirilməsinin və inteqrasiyanın davam etdirilməsinin əleyhinə olması barədə fikirlərlə tanış deyiləm. Ümidvaram ki, Müsavat da bu inteqrasiyanın dərinləşməsinə maraq göstərəcək”.

“Azadlıq” blokunun siyasi fəaliyyətini davam etdirəcəyini deyən Ə. Kərimli bu qurumun seçki bloku olmadığını xatırladıb: “Blokdakı partiyalar kifayət qədər yaxın münasibətdədir və bu münasibətləri qoruyub saxlamaq ümumi müxalifətin maraqlarına uyğundur. Ona görə də seçkidə kimin necə təmsil olunacağı bizim üçün problem deyil. Sadəcə, gələcəkdə müxalifətin daha geniş spektrində də hazırda “Azadlıq” blokunda olan səmimi atmosferin formalaşmasını arzu edirəm”.

Ə. Kərimlinin fikrincə, seçkilər ölkədəki siyasi qüvvələrə daha bir son baxış olub və bu baxış kimlərin öz prinsipial siyasətlərini davam etdirə bildiklərini müəyyənləşdirib: “Biz gördük ki, kimlər artıq konstruktiv müxalifət kimi müəyyənləşdirilmiş standartlara uyğunlaşıblar. Biz hökumətin müəyyənləşdirdiyi çərçivəyə daxil olmamış siyasi qüvvələrin daha sıx inteqrasiyasına nail olmaq və ölkədəki çatışmazlıqlara qarşı mübarizə aparmaq, müəyyən azadlıq adalarını qoruyub saxlamaq, onların sərhədlərini genişləndirmək, demokratiya üçün addım-addım da olsa, müəyyən işlər görməyi düşünürük”.

Ə. Kərimli konstruktiv müxalifət anlayışı ilə bağlı da danışıb və YAP funksionerlərin ölkənin hazırkı aparıcı müxalifətinin yalnız seçkidə iştirak edən qüvvələrdən ibarət olduğunu demələrinə də münasibət bildirib: “Hakimiyyət özünə müxalifət seçə bilməz. Müxalifət ya olursan, ya da olmursan. Əgər siyasi qüvvə öz fəaliyyəti ilə iqtidarın marağına xidmət edirsə, o, ümumiyyətlə, müxalifət deyil. Müxalifət iqtidarda olan qüvvənin əleyhinə olan, onun siyasətini bəyənməyən, onun hakimiyyətini dəyişmək istəyən qüvvələrin təmsil etdiyi təşkilatdır. Əgər bir siyasi qüvvənin qarşısında iqtidarı dəyişmək məqsədi yoxdursa, o özünü necə müxalifət adlandıra bilər?”

AXCP sədri bələdiyyə və parlament seçkilərində iştirak etməyə meylli olduqlarını da söyləyib. Onun sözlərinə görə, seçkilər yaxınlaşdıqca ölkədəki siyasi vəziyyət bu qərara təsir göstərə bilər: “Biz hesab edirik ki, bu seçkilərdə çoxlu sayda iddialı olduğuna görə, vətəndaşları kütləvi şəkildə aktiv mübarizəyə cəlb etmək üçün yaxşı fürsət var. Amma yenə də seçkidə iştirakla bağlı son qərarı seçkilər yaxınlaşanda verəcəyik”.

Ə. Kərimli deyib ki, rəhbərlik etdiyi partiyadan olan son itkilər prinsipial siyasətləri ilə bağlıdır: “Məsələn, biz seçkiyə getsəydik, Qulamhüseyn Əlibəyli partiyadan istefa verməyəcəkdi. Biz partiya üçün hətta önəmli olan bir neçə nəfərin getməməsi naminə, bütövlükdə təşkilatın prinsiplərini ayaqlaya bilməzdik”.

AXCP sədri seçkilərdən sonra partiyasının cəmiyyətdə mövqeyinin gücləndiyini bildirsə də, partiya üzvlərinin prezident seçkilərində iştirak edib-etməməsi ilə bağlı məlumatı olmadığını deyib: “Biz xüsusi olaraq bunun monitorinqini aparmamışıq”.