Daxili siyasət

Ana səhifə

Daxili siyasət

Milli Məclisin daimi komissiyalarının birgə iclasında Şəhərsalma Məcəlləsi müzakirə olunub

15 dekabr 2008 11:51 (UTC +04:00)

Bakı. Elbrus Seyfullayev-APA. Bu gün Milli Məclisinin dörd daimi komissiyasının birgə keçirilən iclasında Şəhərsalma Məcəlləsi müzakirəyə çıxarılıb. APA-nın məlumatına görə, iclasda parlamentin iqtisadi siyasət daimi komissiyasının sədri Ziyad Səmədzadə bildirib ki, Şəhərsalma Məcəlləsi şəhərsalma fəaliyyəti, ərazilərin, o cümlədən şəhərlərin və digər yaşayış məntəqələrinin inkişafı üzrə ərazi planlaşdırılması, şəhərsalma zonalaşdırılması, əsaslı tikinti obyektlərinin memarlıq-inşaat layihələndirilməsi, tikintisi, əsaslı təmiri və yenidən qurulması şəklində həyata keçirilən fəaliyyəti tənzimləyəcək. Onun sözlərinə görə, hazırda Azərbaycan əhalisinin 30 faizi paytaxt Bakı şəhərində, ümumilikdə 50 faizi isə şəhərlərdə yaşayır.

Müzakirələr zamanı çıxış edən deputat Vahid Əhmədov ölkənin bütün bölgələrində heç bir qaydaya və plana uyğun olmayan tikinti işlərin aparıldığını bildirib. Onun sözlərinə görə, ölkədə xüsusilə də paytaxtda tikinti işləri baş plana uyğun aparılmalıdır. V. Əhmədov bu qanun qəbul edildikdən sonra ona nəzarətin Milli Məclisə verilməsi ilə bağlı təklif irəli sürüb.

Parlamentin Hüquq siyasəti və dövlət quruculuğu daimi komissiyasının sədri Əli Hüseynov Şəhərsalma Məcəlləsinin yalnız estetik məsələləri özündə əks etdirdiyini deyib. Onun sözlərinə görə, şəhərsalma ilə bağlı inzibati məsələlər Tikinti Məcəlləsində öz əksini tapacaq.

Deputat Qüdrət Həsənquliyev bu məcəllənin ayrıca qanun şəkilində qəbul edilməsinə ehtiyac olmadığını bildirib. Onun sözlərinə görə, Bakı şəhərinin mərkəzindən kənar ərazilərdə şəhər üçün vacib olan komplekslərin heç biri inşa edilməyib: “Bu gün Bakının Əhmədli, Günəşli və digər ərazilərində kinoteatrlar, idman kompleksləri və digər qurğular fəaliyyət göstərmir”. Deputat deyib ki, paytaxtda inşa edilən bütün tikililər baş plana uyğun aparılmalı və estetik cəhətdən gözəl görünməlidir.

Deputat Nizami İsgəndərov Bakı şəhərində aparılan bütün tikinti işlərinə nəzarətin yalnız bir qurumun əlində cəmləşdirilməsinin vacib olduğunu vurğulayıb. Onun sözlərinə görə, belə olacağı təqdirdə cəmiyyətin narahatlıq mənbəyinə çevrilən milli arxitektura qaydalarının pozulmasının qarşısı alınacaq.

Parlamentin insan haqları daimi komissiyasının sədri Rəbiyyət Aslanova bu sənədin ictimaiyyətin müzakirəsinə çıxarılmasının vacib olduğunu deyib. Komissiya sədri mövcud vəziyyətin ağırlığını Bakı şəhərinin baş planın olmaması ilə əlaqələndirib.
Dövlət Şəhərsalma və Arxitektura Komitəsinin sədri Abbas Ələsgərov son 25 ildə tikinti planlaşdırılmasına heç bir vəsait ayrılmadığını diqqətə çatdırıb və problemlərin çoxunun da buradan qaynaqlandığını deyib. Müzakirələrdən sonra sənəd birinci oxunuşda parlamentə tövsiyə edilib.