Daxili siyasət

Ana səhifə

Daxili siyasət

Əli Həsənov: “ATƏT-in prezident seçkiləri ilə bağlı yekun hesabatını normal qiymətləndirirəm”

18 dekabr 2008 12:25 (UTC +04:00)

Bakı. Kəmalə Quliyeva – APA. “ATƏT-in prezident seçkiləri ilə bağlı yekun hesabatını normal qiymətləndirirəm”. APA-nın məlumatına görə, bunu jurnalistlərə açıqlamasında Prezidentin İcra Aparatının ictimai-siyasi şöbəsinin müdiri Əli Həsənov deyib. O bildirib ki, ATƏT prezident seçkiləri ilə bağlı ilkin rəyində də bu seçkilərin Avropa standartlarına və Azərbaycanın beynəlxalq təşkilatlar qarşısında götürdüyü öhdəliklərə uyğun olduğunu bəyan etmişdi. Ə. Həsənov bəzi texniki parametrlərin, o cümlədən seçki proseslərinin idarə edilməsinin bu qurumun istək və arzularına uyğun olmadığını da söyləyib: “Biz də bunu bilirdik. Bu da seçki komissiyalarının formalaşdırılması ilə bağlı idi. Bu məsələdə parlamentdə təmsil olunan siyasi partiyalar ümumi razılığa gələ bilmədilər. Buna görə də parlamentdə təmsil olunan partiyaların nümayəndəlik normalarına uyğun olaraq, seçki komissiyaları formalaşdı. Bu addımı biz mövcud halda ən normal və düzgün addım hesab edirdik. Əsas odur ki, seçkidə kütləvi saxtakarlığa rast gəlinmədi, hər hansı vətəndaş etimadsızlığı olmadı, hər vətəndaş öz səsvermə prosedurunu həyata keçirdi. Buna müvafiq də səslər hesablandı”.

Ə. Həsənov onu da əlavə edib ki, digər müşahidəçilərin rəyləri kimi, ATƏT-in rəyindən də gələcəkdə seçki praktikasının təkmilləşdirilməsi üçün istifadə olunacaq.

əli_həsənov