Daxili siyasət

Ana səhifə

Daxili siyasət

Azərbaycan Konstitusiyasına əlavə və dəyişikliklərlə bağlı referenduma dair MSK-nın qəbul etdiyi Təqvim Planı açıqlanıb

05 yanvar 2009 09:21 (UTC +04:00)

MSK-nın mətbuat xidmətindən APA-ya verilən məlumata görə, müşahidəçilərin qeydiyyatına qanuna uyğun olaraq referendum hazırlığına start veriləndən başlayıb. Dairə Seçki Komissiyalarında (DSK) isə müşahidəçilərin qeydiyyatı martın 13-dək davam edəcək. Bu günə qədər hələlik MSK və DSK-lara müşahidəçiliklə bağlı müraciət olunmayıb.

Referendumla bağlı təbliğat-təşviqat aparmaq üçün təşviqat qrupunun qeydə alınması üçün zəruri olan seçki sənədlərinin müvafiq seçki komissiyasına təqdim edilməsi üçün müəyyən olunmuş müddət isə fevralın 1-i saat 18.00-da başa çatacaq. Bu günə qədər bir neçə təşəbbüs qrupu yaradılaraq artıq sənədləri MSK-ya təqdim edib.

Seçkilərdə olduğu kimi, referendum öncəsi də seçki komissiyaları seçici siyahılarının dəqiqləşdirilməsinə başlayacaq. Bu proses Seçki Məcəlləsinin 48.1 maddəsinin tələbinə uyğun olaraq səsverməyə 35 gün qalmış - fevralın 11-də başa çatacaq. Bundan sonra seçici siyahıları MSK-nın iclasında təsdiqlənəcək və “Seçkilər” İnformasiya Mərkəzinin internet saytında yerləşdiriləcək. Daimi qeydiyyatda olduğu ərazidə yaşamayan seçicilər qeydiyyatdan çıxma vəsiqəsi ilə referendumun səs verməsində iştirak edə biləcəklər. Bu məqsədlə müraciət edən seçicilərə martın 15-dək qeydiyyatdan çıxma vəsiqəsi veriləcək.

Referendum qabağı təbliğat-təşviqat kampaniyası fevralın 18-dən martın 17-i saat 8.00-a qədər davam edəcək. Bu prosesdə yalnız təşviqat qrupları iştirak edə bilər.

Referendumla bağlı səsvermə martın 18-i saat 8.00-da başlayacaq, saat 19.00-da başa çatacaq. Gün ərzində 5 dəfə səsvermənin gedişi ilə bağlı ilkin məlumatlar veriləcək. Seçki Məcəlləsinin 138.1 və 138.4-cü maddələrinə uyğun olaraq səsvermə günündən başlayaraq, 25 gündən gec olmayaraq – aprelin 11-dək referendum səsverməsinin nəticələrinə yekun vurulmalıdır.

Konstitusiya_dəyişiklik