Daxili siyasət

Ana səhifə

Daxili siyasət

Turqut Ərin kitabındakı fikirlər Azərbaycan ictimaiyyətində narazılıqla qarşılanıb - SORĞU

Turqut Ərin kitabındakı fikirlər Azərbaycan ictimaiyyətində narazılıqla qarşılanıb - <font color=red>SORĞU</font>

01 dekabr 2010 10:38 (UTC +04:00)

Bakı-APA. “Əslində Turqut ərciklər və onlara bənzərlərin hədyanları heç cavaba layiq deyil. Çünki siyasət tullantısı olan bu qəbil biveclərə cüzi də olsa diqqət ayırmaq onların layiq olmadığı səviyyədir. Lakin indiki halda Turqut Ər, zənnimcə bir vasitədir. Bu adın, bu cızma-qaraların arxasında Azərbaycan-Türkiyə əleyhinə olan qara məkrli siyasətlər və qüvvələr dayanır. Turqut Ər üzdə görünəndir. Onu və ona oxşarları içəridə və çöldə idarə edən, qısqırdan qara, murdar əllər var. Ona görə də bu halda susmaq olmaz”. Bu açıqlamanı APA-ya Nizami adına Ədəbiyyat Muzeyinin direktoru, deputat Rafael Hüseynov verib. O bildirib ki, Azərbaycanın inkişafı, Azərbaycan-Türkiyə münasibətlərinin durmadan dərinləşməsi və yüksəlişi Azərbaycan və Türkiyə əleyhinə olanların yuxusuna haram qatır: “Bu səbəbdən də onlar hər vasitə ilə suyu bulandırmağa, insanları çaşdırmağa, şər, iftira püskürməyə, təxribatlar törətməyə fürsət gəzirlər. Bu zaman ən iyrənc vasitələrdən istifadə etməkdən də çəkinmirlər. Riyakarcasına “Azərbaycanı sevirəm” deyərək Azərbaycana qara yaxmaq, Azərbaycan əleyhinə işləmək nifrətə layiqdir. Heydər Əliyev haqqında, Azərbaycan dövləti barəsində, bütövlükdə gerçəkliyimiz haqqında Turqut Ərin irinli yazıları bir türkün qələmindən çıxan yazı deyil. Bu, düşmən kininin, yağı münasibətinin ifadəsidir. Heydər Əliyev sadəcə böyük dövlət adamı, müstəsna siyasətçi deyil, o, Azərbaycanın dəyərlərindən, rəmzlərindən olan nadir şəxsiyyətdir. O uca ada qarşı çıxan Azərbaycana həqarət edir. Mən Turqut ərciklərin hədyanlarını rədd edirəm və inanıram ki, vicdanlı Azərbaycan insanları mütləq əksəriyyətdə bu yaramazı rədd edirlər. Onu dəstəkləyən kimlərsə varsa, onlar bizdən deyil. Azərbaycan güclü dövlətdir, onun qüdrətli rəhbəri var və bu, buna bənzər cılız hücumlarla, cılız tərpənişlərlə Azərbaycanı, Azərbaycan insanını, dövlətini, mənəviyyatını nə şəkildəsə müvazinətindən çıxarmağa cəhd göstərmək yersizdir”.

Milli Məclisin İnsan Hüquqları Komitəsinin sədri Rəbiyyət Aslanova isə bildirib ki, 1994-2000-ci illərdə Türkiyənin Azərbaycandakı səfirliyində mətbuat xidmətinin rəhbəri işləmiş və Azərbaycanın müstəqillik dövrünün çox mühüm tarixi bir mərhələsinin şahidi olmuş bir insanın bu cür kitab yazması heç bir mənəviyyat çərçivəsinə sığmır: “Çünki onun burada olduğu dövr Azərbaycanın müstəqillik tarixində xüsusi əhəmiyyəti olan bir dövrdür. Bu, Azərbaycanın müstəqilliyinin özünütəsdiq dövrü idi, Azərbaycanda çox mühüm islahatlar gedirdi. Həmin adam bütün yüksəliş və tərəqqinin şahidi olmuş birisi idi. Bütün bunları görməmək, görmək istəməmək arzusu, bütün bunlara qara yaxmaq hissi, istəyi, duyğusu bu insanı belə bir böhtan dolu cızma-qara yazmasına gətirib çıxarıb. Adına “yazar” deyən insan həqiqəti danmamalıdır, siyasi gerçəkliyə düzgün qiymət verməlidir. Ancaq mən həmin adama heç “yazar” da demək istəmirəm. Bu bir yana, onun yazdıqları Türkiyə-Azərbaycan münasibətlərinə heç bir xələl gətirən deyil və ola da bilməz. Mənə ən çox təsir edən bu cızma-qaranı, böhtanı Azərbaycan ictimaiyyətinə təqdim edən müxalifət qəzetləridir. O şəxslərdir ki, onlar Turqut Ərin böhtan dolu cızma-qaralarını həqiqət kimi öz qəzetlərində çap etdirirlər. Niyə məhz bu gün çap etdirirlər? Turqut Ərlə Azərbaycan müxalifətinin əlaqələrinin olması məlum idi. Turqut Ər özü yazılarında bildirir ki, Azərbaycan müxalifətçiləri ilə dostdur, onun ən yaxın dostları Azərbaycan müxalifətçiləridir. Hətta bu ilki parlament seçkilərindən öncə o, Azərbaycan müxalifətçilərindən konkret adlar çəkərək “bu adamların parlamentə düşməsi vacibdir, onlar demokratiyaya xidmət edəcək” kimi yazılar yazırdı. Bu gün həmin müxalifətçilər parlamentə düşmədiklərinə görə, öz uğursuzluğuna haqq qazandırmaq və cəmiyyətdə yenə bir çaşqınlıq yaratmaq üçün Turqut Ərin cızma-qaralarını öz qəzetlərində çap edir, ortaya qoyublar, hələ bundan fəxarət də duyurlar. Ar olsun bu insanlara!”

«Olaylar» İnformasiya Agentliyinin baş direktoru Yunus Oğuz APA-ya açıqlamasında Turqut Ərin «Azadlıqdan tiranlığa» adlanan kitabında 1993-1994-cü illərə dair yer alan məlumatların tamamilə qərəzli olduğunu deyib: “O dövrdə mən dövlət müşaviri olmuşam və hadisələr mənim gözümün önündə baş verib. Bu kitabda əksər hadisələrin təhrif olunmuş mətnləri yer alıb. Kitabda Surət Hüseynovun Gəncədə qaldırdığı qiyamla bağlı məsələlərdə bu özünü daha çox göstərir”. Bu hadisələrdə o zaman baş nazir vəzifəsində çalışan Pənah Hüseynin daha çox rol oynadığını deyən Y.Oğuzun sözlərinə görə, o vaxt P. Hüseyn qərargaha rəhbərlik edib və hadisələrlə bağlı xəbərlər birbaşa ona verilib: “Heydər Əliyevin Azərbaycana çağırılmasının necə baş verdiyinin şahidi biz olmuşuq. Prezident iqamətgahında bununla bağlı keçirilən toplantıda mən, rəhmətlik Nəcəf Nəcəfov, İsa Qəmbər, Pənah Hüseyn və digər şəxslər iştirak etmişik. Amma kitabda bu fakt da təhrif olunur. Deyə bilərəm ki, hadisələrin kitabda başqa şəkildə verilməsi kimlərinsə marağındadır. Əgər o zaman iclasda iştirak edən çoxluq bunu istəməsəydi, demək olar ki başqa variant ortaya çıxacaqdı. Surət Hüseynovla da danışıqları çox zaman Tamerlan Qarayev aparırdı”.

Yunus Oğuz hesab edir ki, kitabda Azərbaycanda müəyyən daxili prosesləri qarışdırmaq, təhdid və təzyiqlər tendensiyası görünür: «Görünür kimlərsə bu vasitə ilə Azərbaycandan nəyisə almaq istəyirlər. Çalışırlar ki bu yolla Azərbaycana təzyiq göstərsinlər. Kitabın parlament seçkiləri ərəfəsində Azərbaycanda yayılması da buna hesablanıb».

Millət vəkili Musa Qasımlı da eyni fikirləri bölüşür: “Təəssüf ki, “Azadlıqdan Tiranlığa” adlı kitabda həmin illərdə baş verən hadisə və proseslərə obyektiv münasibət bəslənilmir, məsələlərə obyektiv yanaşılmır. Kitabda hadisələrə qərəzli yanaşma var. Müəllifin kitabda kin-küdurəti açıq hiss olunur”.

Tarixçi-alimin sözlərinə görə, kitabın müəllifi Turqut Ərin Azərbaycanda baş verən proseslərə belə yanaşması məqsədli olub: “Çünki bu hadisələr bizim gözlərimiz qarşısında baş verib. Müxtəlif ölkələrin xüsusi xidmət orqanları Azərbaycanı parçalamaq, hegemonluğa nail olmaq üçün müxtəlif vasitələrdən istifadə ediblər. Ölkəmizdə baş verən çevriliş cəhdləri də həmin amillərlə bağlıdır. Amma şükür ki, bu çevriliş cəhdləri Heydər Əliyevin qətiyyəti nəticəsində qarşısı alınıb. Azərbaycan bu günlərə güclü dövlət kimi gəlib çıxıb. Hakimiyyət daxilində birlik yaranıb və hakimiyyətlə-xalq arasında uçurum aradan qaldırılıb. Bütün bunlar Heydər Əliyevin müsbət fəaliyyətinin nəticəsidir”.

M. Qasımlı bildirib ki, Turqut Ər Azərbaycan-Türkiyə dostluq və qardaşlığına xələl gətirən bir addım atmamalı idi: “Onun bu addımı bir daha dəqiqləşdirdi ki, bizim münasibətləri pozmaq istəyən qüvvələr həm Türkiyənin daxilində, həm də Azərbaycanda var. Belə kitabların Türkiyədə nəşrini də məqbul hesab etmirəm”.

M. Qasımlı qeyd edib ki, hansısa bir yazar Azərbaycanın və Türkiyənin dövlət xadimlərinin fəaliyyətinə kölgə sala bilməz: “Hadisələrə yanaşmalar müxtəlif ola bilər. Dövlət xadimlərinə qiymət verərkən obyektivliyi itirmək olmaz. Dövlət xadimlərinə qiymətin meyarları gözlənilməlidir. Hər hansı yazı bu dövlət xadimələrinin tarixdə tutduğu yeri dəyişdirə bilməz”.