Daxili siyasət

Ana səhifə

Daxili siyasət

Azərbaycan MSK-nın sədri: “Dağlıq Qarabağ separatçılarının oktyabrın 14-nə təyin etdikləri “bələdiyyə seçkilərin”in heç bir hüquqi əsası yoxdur”

28 avqust 2007 10:42 (UTC +04:00)

APA-nın məlumatına görə, bu sözləri Mərkəzi Seçki Komissiyasının (MSK) sədri Məzahir Pənahov Azərbaycan torpaqlarını işğal etmiş Dağlıq Qarabağ separatçılarının oktyabrın 14-nə “bələdiyyə seçkiləri” təyin etməsinə münasibət bildirərkən deyib. Dünya ictimaiyyətinin də erməni separatçılarının keçirdikləri “seçkiləri” tanımadığını söyləyən MSK sədri Dağlıq Qarabağda indiyə kimi keçirilmiş bütün seçkilərə beynəlxalq qurumların kəskin münasibət bildirdiyini xatırladıb: “Hətta beynəlxalq qurumlar Azərbaycanın müvafiq strukturlarından əvvəl bu məsələyə münasibət bildirir, oyuncaq seçkiləri qəbul etmədiyini bəyan edir. Erməni separatçılarının oktyabrın 14-nə təyin etdikləri “seçkilərin” də heç bir hüquqi əsası yoxdur və heç bir ölkə onların formalaşdırdıqları strukturları qəbul etmir. Bu məsələdə Azərbaycanın mövqeyi çox qətidir. 90-cı illərdə bu məsələlərlə bağlı yalnız Azərbaycanın səsi eşidilirdisə, indi bütün beynəlxalq qurumlar bizə dəstək verir. Bu, Azərbaycanın apardığı xarici siyasətin uğurudur”. M. Pənahov separatçı Dağlıq Qarabağ rejiminin atdığı bütün addımların Azərbaycanın Konstitusiyasına və beynəlxalq hüquqa zidd olduğunu da vurğulayıb. /APA/