Daxili siyasət

Ana səhifə

Daxili siyasət

Müxalifət partiyasının sədrləri niyə hadisə yerində görünmədilər?

01 sentyabr 2007 12:21 (UTC +04:00)

Azərbaycanın paytaxtında baş verən bina uçqunundan sonra hadisə yerinə müxtəlif təbəqələrin nümayəndələri gəlsə də, müxalifət partiyalarının liderləri həmin ərazidə görünmədilər. Bunun səbəblərini öyrənmək üçün APA partiya liderlərinə müraciət edib.
Azərbaycan Milli İstiqlal Partiyasının lideri Etibar Məmmədov hadisə baş verən vaxt ərazinin yaxınlığında olduğunu bildirib. Uçqun barədə kifayət qədər məlumatlı olduğunu deyən E. Məmmədov hesab edir ki, həmin məqamda siyasi liderlərin əraziyə getməsinə ehtiyac yoxdur: “Hadisə baş verən ərazidə mütəxəsislər işləməlidir. Kiminsə orada şəkil çəkdirməyə gəlməsinə ehtiyac yoxdur. Digər ölkələrdə isə partiya liderlərinin və sədrlərin xüsusi statusları olur. Bizdə isə müxalifətdə olanların heç bir statusu yoxdur, statusu olanlar da statuslarından istifadə edə bilmirlər”.
Klassik Xalq Cəbhəsi Partiyasının sədri Mirmahmud Mirəlioğlu isə bildirir ki, bir sıra müxalifət liderləri belə addımları yalnız şəkil çəkdirmək üçün edirlər: “Onlar toya və yaxud yasa da bu prinsiplə gedirlər. Amma reklam üçün addım atmayanlar da var. İnanıram ki, hadisə baş verən yerə bir sıra müxalifət liderləri gedib. Hadisə baş verən gün mən də həmin ərazidə olmuşam və yaxından maraqlanmışam”.
Azərbaycan Sosial Demokrat Partiyasının həmsədri Araz Əlizadə isə cərahiyyə əməliyyatı olduğu üçün uçqun baş verən əraziyə gedə bilmədiyini deyib.
Müsavat Partiyasının Mərkəzi İcra Aparatının rəhbəri Arif Hacılı isə hadisə baş verdikdən dərhal sonra ərazidə olduğunu deyib: “Bununla bağlı partiyanın Divanı toplandı və məsələyə münasibət bildirildi”. Partiya başqanı İsa Qəmbərin ərazidə olmamasına gəldikdə A. Hacılı “Ola bilsin ki, İsa bəy də orada olub, amma mənim xəbərim yoxdur” deyib.
Vətəndaş Həmrəyliyi Partiyasının sədri Sabir Rüstəmxanlı hadisə yerində iki dəfə olunduğunu və yaxından maraqlandığını deyib. Onun sözlərinə görə, həmin günlər əraziyə yaxın buraxılmadığı üçün hadisəni yalnız kənardan izləyib və əhali ilə söhbət edib.
Millət vəkili Pənah Hüseyn isə hadisə baş verən vaxt Dövlət Statistika Komitəsinin yaxınlığında olduğunu və hadisədən dərhal xəbər tutduğunu deyib: “Amma həmin vaxt orada vəziyyət elə idi ki, deputatın və yaxud siyasi liderin orada görünməsi hadisəyə siyasi çalar verərdi. Xilasedicilər işləyən vaxt orada olmaq isə etik cəhətdən düzgün olmazdı”.
Azərbaycan Liberal Partiyasının İcraiyyə Komitəsinin sədri Elman Məmmədzadə partiyanın lideri Lalə Şövkətin hadisə yerinə getməsinə ehtiyac olmadığını deyib. Onun sözlərinə görə, hadisə baş verən yerə siyasilərin yox, mütəxəsislərin getməsi vacibdir: “Siyasilərin həmin əraziyə getməsi hadisəyə siyasi rəng verə bilər”.
Azərbaycan Xalq Cəbhəsi Partiyasının sədri Əli Kərimli Bakıdan kənarda, Azərbaycan Demokrat Partiyasının sədri Sərdar Cəlaloğlu isə İsveçə səfərə getdiyi üçün hadisə yerinə gələ bilməyiblər. /APA/