Daxili siyasət

Ana səhifə

Daxili siyasət

Avropa Şurasının insan haqları üzrə komissarı Tomas Hammarberqin Bakıda görüşləri davam edir

03 sentyabr 2007 09:32 (UTC +04:00)

Azərbaycanda səfərdə olan Avropa Şurasının insan haqları üzrə komissarı Tomas Hammarberqin görüşləri davam edir. APA-nın məlumatına görə, komissar Media Hüquqları İnstitutunun direktoru Rəşid Hacılı, Reportyorların Azadlığı və Təhlükəsizliyi İnstitutunun rəhbəri Emil Hüseynli, “Gündəlik Azərbaycan” qəzetinin əməkdaşı Üzeyir Cəfərov ilə görüşüb. Görüşdən sonra jurnalistlərə açıqlama verən R. Hacılı bildirib ki, Tomas Hammarberq Azərbaycanla bağlı lazım olan məlumatları əvvəlcədən toplayıb: “Qonaq Azərbaycanla bağlı kifayət qədər məlumatlı şəxsdir. Görüşdə onu maraqlandıran məsələlər ətrafında fikir mübadiləsi aparıldı. Görüşdə, həmçinin, radio və televiziyaların tezlikləri, internet sahəsində olan problemlərə toxunuldu”. Bundan başqa görüşdə mətbuat-məhkəmə çəkişmələri, diffamasiya haqqında qanun layihəsi müzakirə olunub, “Gündəlik Azərbaycan” qəzetinin baş redaktoru Eynulla Fətullayevin həbsinin səbəbləri, səhhətində yaranmış problemlərə toxunulub. Qonaq Tomas Hammarberq media təmsilçilərindən sonra politoloqlar Zərdüşt Əlizadə, Rasim Musabəyov və Hikmət Hacızadə ilə görüşüb. /APA/