Hadisə

Ana səhifə

Hadisə

Azərbaycanın səhiyyə naziri “quş qripi” təhlükəsi ilə əlaqədar əhalini ayıq-sayıq olmağa çağırıb

08 fevral 2007 10:09 (UTC +04:00)

APA-nın məlumatına görə, bu barədə jurnalistlərə məlumat verən səhiyyə naziri Oqtay Şirəliyev əhalini “quş qripi” ilə əlaqədar ehtiyatlı olmağa çağırıb: “Baş baytar həkiminin məlumatına görə, quşlarla bağlı 17 min laborator tədqiqatı aparılıb. Ancaq indiyə qədər virus aşkar olunmayıb. Ancaq bu, o demək deyil ki, arxayınçılıq olmalıdır. Virus müxtəlif ölkələrdə aşkar olunduğundan biz də çox ayıq olmalıyıq. Dövlət Baytarlıq Xidməti daim buna nəzarət edir. Ölü çöl və ev quşu görəndə, dərhal baytarlıq xidməti və onun yerli şöbələrinə xəbər verilməlidir ki, lazımi tədbirlər görülsün. Quşla təmasda olanda isə gigiyena qaydalarına ciddi riayət etmək lazımdır. Virusdan qorunmaq üçün görülməli tədbirlər çox sadə olsa da, “quş qripi”nin qarşısını almağa çox böyük köməyi var”.
“Quş qripi” ilə bağlı ərazilərə çox ciddi nəzarətin edilməsini vacib sayan nazir bildirib ki, dərman vasitələrinin və qida məhsullarının normativlərini hazırlayaraq Nazirlər Kabinetinə təqdim ediblər: “Bu normativlər sovet dövründən qalmadır və əlbəttə ki, indiki tələblərə uyğun deyil. Ona görə də biz normativləri yenidən işləmişik. Nazirlər Kabinetindən cavab gözləyirik”. /APA/