Hadisə

Ana səhifə

Hadisə

Cəzaçəkmə Müəssisəsinin rəisi: “Mirzə Sakit Müalicə Müəssisəsinə köçürülməyəcək”

02 fevral 2008 12:16 (UTC +04:00)

Ə. Həsənov deyib ki, Mirzə Sakiti müayinə edən həkimlər onun Müalicə Müəssisəsinə köçürülməsini məsləhət görməyib, ona görə də məhbus həbsxana şəraitində müalicə olunacaq.
Mirzə Sakitin həyat yoldaşı Rəna Zahidova isə APA-ya deyib ki, məhkuma və onun ailəsinə həbsxana rəhbərliyi tərəfindən verilən söz növbəti dəfə yerinə yetirilməyib: “Bununla neçənci dəfədir, bizə deyirlər ki, Sakit xəstəxanaya köçürüləcək, amma sonradan sözlərinə əməl etmirlər. Rəis mənə demişdi ki, həftənin sonunda onu xəstəxanaya köçürəcəklər. O da bilir ki, Sakitin səhhəti olduqca ağırdır və həbsxanada müalicə olunması mümkün deyil. Nəyə görə imkan verilmir?”
M. Sakitin Müalicə Müəssisəsinə köçürülməyəcəyi halda yenidən aclığa başlayacağını bəyan etdiyini xatırladan R. Zahidova deyib ki, həyat yoldaşının bu addımı atacağına əmindir: “Bəlkə də o artıq bu gündən aclığa başlayıb”.
Qeyd edək ki, Ə. Həsənov M. Sakitin hazırda aclıq etmədiyini deyib.
Xatırladaq ki, M. Sakit yanvarın 26-da Müalicə Müəssisəsinə köçürülməsi tələbi ilə aclığa başlayıb. Müalicə Müəssisəsinə köçürülməsinə razılıq veriləndən sonra isə o, yanvarın 28-də aclığı dayandırıb. /APA/