Hadisə

Ana səhifə

Hadisə

Azərbaycanın Zaqatala rayonun Qımır kəndi növbəti dəfə canavarların hücumuna məruz qalıb

11 fevral 2008 13:37 (UTC +04:00)

Zaqatala. Hafiz Heydərov-APA. Canavarlar Zaqatalanın Qımır kəndinə növbəti dəfə hücum edib. Sakinlərin APA-nın Şəki-Zaqatala bürosuna verdiyi məlumata görə,
ötən gecə kənd sakini Valeh Məmmədovun həyətinə hücum edən canavarlar bir baş iribuynuzlu heyvanı parçalayıb. Bundan başqa, bir neçə kənd sakininin təsərrüfatına hücum edən canavarlar heyvanlara yüngül xəsarət yetirib. Sakinlərin sözlərinə görə, son vaxtlar kənd ərazisində canavarlara yalnız gecələr deyil, gündüzlər də rast gəlmək mümkündür. Onlar rayon rəhbərliyinin bu istiqamətdə qabaqlayıcı tədbirlər görməməsindən şikayətləniblər. 9 saylı Ərazi Ekologiya və Təbiəti Mühafizə İdarəsinin sektor rəisi Zakir Əliyev APA-nın yerli bürosuna meşə yaxınlığında yerləşən kəndlərdə heyvanların canavarların hücumuna məruz qalması faktını təsdiqləyib. O, bu istiqamətdə qabaqlayıcı tədbirlərin görülməsi üçün rayon rəhbərliyi səviyyəsində iş aparılmasını zəruri hesab edib. Z. Əliyevin dediyinə görə, hazırda ovçular cəmiyyətinin üzvü olan şəxslər, cəmiyyətin üzvlük haqqını ödəməkdə çətinlik çəkir. Buna görə onlara maddi yardım göstərmək və həmin şəxsləri sursatla tam təmin etmək, problemin aradan qaldırılması üçün görülən tədbirlərə cəlb etmək lazımdır: “Kənd sakinlərinin problemi ancaq bu yolla həll olunacaq”.